Yesu gaw sape 12 hpe lata la ngut ai hpang, bum ntsa kaw nna masha wunawng wuwa nga ai shara de yu wa ai. Shanhte ni gaw Galile, Yuda, Turu, Sidon, Suri hte Yawdan Hka wora hkran kaw nna sa wa ma ai. Nkau mi gaw machyi makaw hkrum taw nga ai ni hpe shaga sa wa ai. Nkau mi gaw nat shang ai ni hpe shaga sa wa ma ai. Yesu gaw shanhte yawng hpe shamai ya ai. Dai hpang, Yesu gaw bum nhkrem kaw dung nna, mungga htawn ai. Karai Kasang a jinghku byin mayu yang, hpa galaw ra na lam hpe shi sanglang dan ai. Anhte gaw Yehowa hpe tsawra ra nna, shi a karum shingtau lam ra ai hpe chye na hkap la ra ai. Kaga masha ni hpe n tsawra yang, Karai Kasang hpe mung tsawra lu na n re. Anhte gaw masha yawng hpe tsawra matsan dum nna, tara rap ra ging ai. Anhte a hpyen ni hpe pyi, dai zawn galaw ging ai.

Yesu ndai hku tsun ai: ‘Nanhte gaw tinang a jinghku ni hpe sha tsawra ging ai n rai. Nanhte a hpyen ni hpe pyi tsawra ra ai. Masha ni hpe myit kraw lawang kaw nna mara raw ya ra ai. Na a majaw masha ni myit n pyaw mat yang, shi hpang de kalang ta sa nna, shi hpe hpyi nem u. Tinang hpe masha ni galaw shangun mayu ai zawn, masha ni hpe galaw u.’

 Yesu gaw arung arai hte seng nna mung, kaja ai hpaji jaw ga tsun wa ai. Shi ndai hku tsun ai: ‘Gumhpraw law law lu na hta Karai Kasang a jinghku byin na grau ahkyak ai. Gumhpraw hpe lagut gaw mai lagu ai. Raitim, nang hte Karai Kasang a hku hkau lam hpe gaw, kadai mung n mai lagu ai. Hpa sha na, hpa lu na, hpa hpun na hpe myit hkum tsang sanu. U ni hpe yu u. Karai Kasang gaw shanhte sha lu na daram galoi mung jaw ai. Myit tsang nga ai majaw, asak lani mi grau galu wa ai n re. Nang hpa ra kadawn nga ai hpe Yehowa chye ai hpe dum u.’

Masha hpawng gaw Yesu hkaw tsun ai zawn, kaga ni hkaw tsun ai hpe kalang mi mung n na ga ma ai. Hparishe ni hte laika ka ai sara ni gaw dai lam ni hpe n sharin ya ma ai. Yesu gaw hpa majaw dai daram kaja ai sara re ai kun? Hpa majaw nga yang, shi sharin shaga ai lam yawng gaw Yehowa kaw nna sa ai majaw re.