KPƐLƖKƲƲ 81
Pʋʋ Yɔɔ Tɔm Yɔɔdʋʋ
Yesu lɩzɩ apostoloowaa 12 nɛ pɩtɛ lɛ, ewolo pʋʋ yɔɔ peeɖe hɔɔlʋʋ nakʋyʋ taa samaɣ sɔsɔɔ nakɛyɛ cɔlɔ, kaakpeɣlaa nɛ kaɖaŋɩ-ɩ. Ɛyaa kaalɩnɩ Galilee, Yudee, Tiiri, Sidɔɔ, Siirii nɛ Yɔɔrdaŋ ageeta lɛɛna taa. Paakɔnɩ ɛyaa mba pɩwɩɣaɣ-wɛ nɛ aliikenaa nɛ Yesu waa pa-tɩŋa payɩ. Pʋwayɩ lɛ, Yesu caɣ nɛ ɛpaɣzɩ-wɛ tɔm wɩlʋʋ. Ɛwɩlɩ-wɛ mbʋ pɩwɛɛ se ɖɩla, ye ɖɩñɩnɩɣ se ɖɩkɛ Ɛsɔ taabalaa kɔyɔ. Pɩwɛɛ se ɖɩkpɛlɩkɩ Yehowa yɔɔ tɔm nɛ ɖɩsɔɔlɩ-ɩ. Ɛlɛ ye ɖɩtɩsɔɔlɩ ɛyaa lalaa yɔ, ɖɩɩpɩzɩɣ nɛ ɖɩtɔ se ɖɩsɔɔlɩ Ɛsɔ. Pɩwɛɛ se ɖɩla paa anɩ mbʋ pɩwɛ ɖeu yɔ, halɩ pɩkpɛndɩnɩ ɖo-koyindinaa.
Yesu yɔɔdaa se: ‘Taasɔɔlɩ ña-taabalaa ɖeke. Ɛlɛ pɩwɛɛ se ŋsɔɔlɩ ɖɔɖɔ ño-koyindinaa nɛ ŋkpakɩɣ ɛyaa lalaa kɩwɛɛkɩm nɛ ŋkpeɣu-wɛ nɛ ña-laŋɩyɛ pilim. Ye ŋnawa se nɔɔyʋ taa wɛnɩ-ŋ yɔ, wolo ɛ-cɔlɔ kpaagbaa nɛ ŋtendi-i nɛ ɩñɔɔzɩ tɔm. Mbʋ ŋsɔɔlaa se lalaa ɩlabɩ-ŋ yɔ, ña ɖɔɖɔ ñaɣ pana nɛ ŋlabɩ-wɛ pʋ.’
Yesu tasɩ heyuu samaɣ lɩmaɣza wena pɩwɛɛ se kɛwɛɛnɩ ɛjaɖɛ yɔɔ ñɩm yɔɔ yɔ. Ɛyɔɔdaa se: ‘Yehowa taabalʋ kɛʋ kɩlɩ ɖeu ñɩm sakɩyɛ wɛnʋʋ. Mɩlʋ pɩzɩɣ nɛ ɛmɩlɩ mi-liidiye, ɛlɛ nɔɔyʋ ɛɛpɩzɩɣ nɛ ɛmɩlɩ taabalɩyɛ nɖɩ ɖɩwɛ mɩ nɛ Yehowa mɩ-hɛkʋ taa yɔ. Iyele nɩɣzʋʋ mbʋ pɩwɛɛ se ɩtɔɔ, ɩñɔɔ yaa isuu yɔ pɩ-yɔɔ. Ɩcɔnɩ sumasɩ nɛ ɩna. Ɛsɔ haɣ-sɩ tɔɔnaɣ paa ɖooye. Nɩɣzɛ ɩɩsɔzʋʋ ɛyʋ wezuu ɖaɣlɩkɩŋ, paa evemiye kʋɖʋmɖɩyɛ maɣmaɣ. Ɩtaasɔɔ se Yehowa sɩm mɩ-kɩcɛyɩm tɩŋa.’
Wiɖiyi samaɣ tɩna ɛyʋ nɔɔyʋ yɔɔdaa ɛzɩ Yesu yɔ. Pɛ-Ɛsɔ sɛtʋ agbaa ñʋndɩnaa taawɩlɩ-wɛ tɔm ndʋ. Ɛbɛ yɔɔ Yesu kaakɛ wɩlɩyʋ kɩbanʋ? Mbʋ pʋyɔɔ yɔ, tɔm ndʋ ɛyɔɔdaɣ payɩ yɔ, Yehowa cɔlɔ tɩlɩnaa.
“Ɩkpaɣ man-sʋʋtʋ nɛ ɩsɩɣlɩ nɛ ɩkpɛlɩkɩ mɔn-cɔlɔ se: Mɛnkɛ laŋɩyɛ kɩbanɖɛ tʋ nɛ hɛɛɛ tʋ; nɛ ihiɣ hɛzʋʋ mi-ciyamnaa taa.” —Maatiyee 11:29