Dipôs ki Jizus skodje se 12 apóstlu, el dixi di kel monti i el bai pa un lugar ki tinha txeu algen djuntadu. Kes algen ben di Galilea, Judea, Tiru, Sídon, Síria i di kel otu ladu di Riu Jurdon. Es leba kes algen ki staba duenti i alguns ki tinha dimónis. Jizus kura tudu es. Dipôs el xinta na pé di monti i el kumesa ta pâpia. El splika kuzê ki nu meste faze si nu krê ser amigu di Deus. Nu meste ntende ma nu ta dipende di Jeová i nu meste prende ama-l. Má nu ka ta pode ama Deus si nu ka ta ama nos kunpanheru. Nu meste ten amor i ser justu ku tudu algen, ti nos inimigus.

Jizus fla: ‘Ama sô nhos amigus ka ta txiga. Tanbê nhos meste ama nhos inimigus i purdua-s di korason. Si un algen sta xatiadu ku nhos, nhos bai lógu na el i pidi-l diskulpa. Nhos trata otus algen di mésmu manera ki nhos ta gostaba pa es trata nhos.’

 Jizus tanbê da-s bon konsedju sobri modi ki es debe uzaba dinheru. El fla-s: ‘Ser amigu di Jeová é más inportanti di ki ten txeu dinheru. Un ladron pode furta nhos dinheru, má ningen ka ta pode tra nhos, nhos amizadi ku Jeová. Nhos para di preokupa dimás ku kuzê ki nhos ta kume, kuzê ki nhos ta bebe ô kuzê ki nhos ta bisti. Nhos odja pasus ki ta bua na séu. Sénpri Deus ta da-s kel ki es meste pa kume. Preokupa dimás ka ta poi nhos vive más txeu. Nhos lenbra ma Jeová sabe kuzê ki nhos meste.’

Nunka es ka obiba ningen ta papiaba sima Jizus. Ses xéfi di relijion ka ta inxinaba es kes kuza la. Pamodi ki Jizus éra un grandi instrutor? Pamodi tudu kuza ki el ta inxinaba ben di Jeová.