Thutha wa Jesu gũthuura atũmwo arĩa 12, nĩ aaikũrũkire kuuma kĩrĩma-inĩ agĩthiĩ harĩa kĩrĩndĩ kĩnene gĩacemanĩtie. Andũ acio moimĩte Galili, Judea, Turo, Sidoni, Suriata, na mũrĩmo wa Jorodani. Maatwarĩte andũ maathumbũragũo nĩ mĩrimũ na angĩ maathĩnagio nĩ ndaimono. Jesu nĩ aamahonirie othe. Thutha ũcio aaikarire thĩ magũrũ-inĩ ma kĩrĩma kĩu na akĩambĩrĩria kũmaarĩria. Nĩ aamatarĩirie ũrĩa twagĩrĩirũo nĩ gwĩka angĩkorũo nĩ tũrenda gũtuĩka arata a Ngai. No mũhaka tũmenye atĩ nĩ tũrabatara Jehova na twĩrute kũmwenda. Ĩndĩ tũtingĩhota kwenda Ngai angĩkorũo tũtiendete andũ arĩa angĩ. Twagĩrĩirũo kuonanagia tha na kĩhooto harĩ andũ othe, nginya thũ citũ.

Jesu oigire ũũ: ‘Kwenda arata aku tu ti kũiganu. Nĩ ũrabatara kwenda thũ ciaku na ũkohera andũ kuuma ngoro. Mũndũ angĩrakara nĩ ũndũ waku, mũkore o rĩo na ũmwĩre akuohere. Ĩkaga andũ arĩa angĩ ũrĩa ũngĩenda magwĩke.’

 Ningĩ Jesu nĩ aaheire andũ acio ũtaaro mwega mũno wĩgiĩ indo cia kĩĩmwĩrĩ. Oigire: ‘Kũgĩa ũrata na Jehova nĩ kwa bata mũno gũkĩra gũkorũo na mbeca nyingĩ. Mũici no aiye mbeca ciaku, no gũtirĩ mũndũ ũngĩiya ũrata waku na Jehova. Tigaga gũtangĩka nĩ kĩrĩa ũkũrĩa, kĩrĩa ũkũnyua, kana kĩrĩa ũkwĩhumba. Ta rora nyoni cia rĩera-inĩ. Hingo ciothe Ngai nĩ atigagĩrĩra atĩ nĩ ciona irio cia kũigana. Gũtangĩka gũtingĩtũma wĩyongerere mũthenya o na ũmwe ũtũũro-inĩ waku. Ririkana atĩ Jehova nĩ oĩ kĩrĩa ũrabatara.’

Kĩrĩndĩ kĩu gĩtioimĩte kĩiguĩte mũndũ ũngĩ akĩaria ta ũguo Jesu aaririe. Atongoria ao a ndini matiamarutĩte maũndũ macio. Nĩ kĩĩ gĩatũmĩte Jesu akorũo arĩ mũrutani mũnene ũguo? Nĩ tondũ maũndũ marĩa mothe aarutanaga moimaga kũrĩ Jehova.