Konima eshi Jesus a hoolola ovayapostoli 12, okwa li a londoloka ko komhunda ndele tai ponhele opo pa li pa ongala eengudu dovanhu. Ovanhu ova li va dja kuGalilea, Judea, Tirus, Sidoni, Siria nosho yo koushilo waJordan. Ova li va eta ovanhu ovo va li tava mono oixuna komikifi nokuhepekwa keendemoni. Jesus okwa li e va velula aveshe. Opo nee okwa kala omutumba komunghulo womhunda nokuhovela oku va honga. Okwa li a yelifa osho twa pumbwa okuninga opo tu kale ookaume kaKalunga. Otu na okushiiva kutya otwa pumbwa Jehova nokulihonga okukala tu mu hole. Ashike itatu dulu okukala tu hole Kalunga ngeenge katu hole ovanhu vakwetu. Otwa pumbwa okukala tu na onghenda nokuungaunga nawa nakeshe umwe, nokuli novatondi vetu.

Jesus okwa ti: ‘Inashi wana ashike okukala u hole ookaume koye. Owa pumbwa yo okukala u hole ovatondi voye nokukala ho dimine po vamwe tashi di komutima. Ngeenge ope na umwe oo e ku handukila, inda kuye diva ndele to mu pe ombili. Kala ho ungaunga navamwe ngaashi wa hala va ungaunge naave.’

 Jesus okwa pa yo ovanhu omayele mawa kombinga yoinima yopamaliko. Okwa ti: ‘Osha fimana okukala kaume kaJehova shi dulife okukala u na oimaliwa ihapu. Ombudi otai dulu okuvaka po oimaliwa yoye, ashike kape na ou ta dulu okuvaka po oukaume wetu naJehova. Ino kala to lipula kutya oto ka lya shike, oto ka nwa shike ile oto ka djala shike. Tala koudila. Kalunga ohe va file alushe oshisho moku va pa oikulya ya wana. Okukala to lipula itashi ka weda ko koule wokukalamwenyo kwoye. Dimbuluka kutya Jehova oku shii osho wa pumbwa.’

Eemhunga dovanhu kada li da uda nande onale omunhu ta popi ngaashi Jesus. Ovawiliki vomalongelokalunga avo inave va honga oinima oyo. Omolwashike Jesus a li omuhongi munene? Omolwaashi keshe osho a li ta hongo osha dja kuJehova.