មេរៀនទី៨១
សុន្ទរកថានៅលើភ្នំ
បន្ទាប់ពីជ្រើសរើសសាវ័ក១២នាក់ លោកយេស៊ូបានចុះពីភ្នំ ហើយមកដល់កន្លែងដែលមនុស្សជាច្រើនប្រមូលផ្ដុំគ្នា។ ពួកគេមកពីស្រុកកាលីឡេ តំបន់យូឌា ក្រុងទីរ៉ុស ក្រុងស៊ីដូន ស្រុកស៊ីរី និងពីត្រើយម្ខាងនៃទន្លេយ៉ូដាន់។ ពួកគេក៏បាននាំមនុស្សឈឺ និងពួកអ្នកមានវិញ្ញាណកំណាចចូល មកជួបលោកយេស៊ូដែរ។ លោកបានធ្វើឲ្យពួកគេទាំងអស់ជាសះស្បើយ។ បន្ទាប់មក លោកអង្គុយនៅវាលលើភ្នំ ហើយចាប់ផ្ដើមបង្រៀនពួកគេ។ លោកយេស៊ូពន្យល់អំពីអ្វីដែលយើងត្រូវធ្វើ បើយើងចង់ទៅជាមិត្តរបស់ព្រះ។ យើងត្រូវរៀនស្រឡាញ់ព្រះយេហូវ៉ា ដោយទទួលស្គាល់ថា យើងត្រូវការការណែនាំពីលោក។ ប៉ុន្តែ យើងមិនអាចស្រឡាញ់ព្រះបានទេ បើយើងមិនស្រឡាញ់អ្នកឯទៀត។ យើងត្រូវមានយុត្តិធម៌ និងសប្បុរសចំពោះមនុស្សគ្រប់គ្នា រួមទាំងសត្រូវរបស់យើងផង។
លោកយេស៊ូមានប្រសាសន៍ថា៖ ‹បើអ្នកស្រឡាញ់តែមិត្តភក្តិរបស់ខ្លួនប៉ុណ្ណោះ គឺមិនគ្រប់គ្រាន់ទេ តែអ្នកក៏ត្រូវស្រឡាញ់ទាំងសត្រូវរបស់ខ្លួនដែរ ហើយអភ័យទោសឲ្យគេអស់ពីចិត្ត។ បើអ្នកណាម្នាក់ឈឺចិត្តដោយសារអ្នក ចូរប្រញាប់ទៅសុំទោសអ្នកនោះ។ អ្នកត្រូវប្រព្រឹត្តចំពោះគេ ដូចដែលអ្នកចង់ឲ្យគេប្រព្រឹត្តចំពោះអ្នក›។
លោកយេស៊ូក៏បានផ្ដល់ឱវាទល្អអំពីរឿងលុយកាក់ដែរ។ លោកមានប្រសាសន៍ថា៖ ‹ការធ្វើជាមិត្តជាមួយនឹងព្រះយេហូវ៉ា គឺប្រសើរជាងការមានទ្រព្យសម្បត្តិច្រើន។ ចោរអាចលួចទ្រព្យសម្បត្តិរបស់អ្នកបាន តែគ្មានអ្នកណាម្នាក់អាចលួចយកចំណងមិត្តភាពរបស់អ្នកជាមួយនឹងព្រះបានឡើយ។ ឈប់ព្រួយបារម្ភថា តើនឹងបានអ្វីបរិភោគ ផឹក ឬស្លៀកពាក់? ចូរសង្កេតមើលសត្វស្លាប ព្រះតែងតែមានអាហារគ្រប់គ្រាន់សម្រាប់ពួកវា។ ការខ្វល់ខ្វាយនឹងមិនជួយអ្នកឲ្យរស់ថែមមួយថ្ងៃទេ។ សូមចាំថា ព្រះយេហូវ៉ាដឹងច្បាស់អំពីអ្វីដែលអ្នកត្រូវការ›។
បណ្ដាជនមិនដែលឮអ្នកណាបង្រៀនដូចលោកយេស៊ូឡើយ។ ពួកអ្នកដឹកនាំសាសនាមិនបានបង្រៀនពួកគេអំពីរឿងទាំងនេះទេ។ ហេតុអ្វីលោកយេស៊ូជាគ្រូដ៏ល្អប្រសើរ? ពីព្រោះអ្វីៗដែលលោកបង្រៀន គឺមកពីព្រះយេហូវ៉ា។
«ចូរយកនឹមរបស់ខ្ញុំដាក់លើអ្នករាល់គ្នា ហើយរៀនពីខ្ញុំចុះ ពីព្រោះខ្ញុំស្លូត ក៏មានចិត្តរាបទាបផង នោះអ្នករាល់គ្នានឹងមានកម្លាំងចិត្តឡើងវិញ»។—ម៉ាថាយ ១១:២៩
លោកអ្នកក៏ប្រហែលជាចូលចិត្តដែរ
លោកយេស៊ូ ជាផ្លូវ ជាសេចក្ដីពិត ជាជីវិត
សុន្ទរកថាដ៏ល្បីល្បាញនៅលើភ្នំ
សូមស្វែងយល់ចំណុចសំខាន់ពីសុន្ទរកថារបស់លោកយេស៊ូ
