Mɛɛ Chiisu chii kiilaa 12 hɛli, mbo tual pembei, mbo kua naa waŋnda wa faŋga bɛndoo wa. Waŋnda haa ndaa fula Kalili, Chudiaa, Taya, Saidɔŋ, Siiliaa, a o fondaŋnda cheleŋ Chɔɔdaŋ leeloo. Mi waŋnda haa huŋ a wanaa wa a naalaŋ nda vɛlɛ a wanaa nyinaa wɔɔŋnda wa kɔɔli wa. Mi Chiisu siŋgi nda kpou. Okoŋ, mbo chal o pembei holnɔŋndo, mbo kandu waŋnda pɛɛkoo. Mbo tɛɛsial nda nyɛ naŋ nɔ miŋ tosa le miŋ wa o chaŋyɛi niŋ a Mɛlɛka wo. Ŋ nɔ miŋ kɛsiŋ o kɔl maa mɛɛ miŋ sina Chɛhowa, nduyɛ miŋ nɔ kaalaa le ndu. Kɛ te ŋ nɔ kaalaa le waŋnda chieeya le, ŋ nɔla miŋ kaala Mɛlɛka le. Ŋ nɔ miŋ nɔ kɛndɛi, nduyɛ ŋ nɔ miŋ hɛli wana o wana le, o yɔŋ bɛɛ a yaamɔɔwaa naa.

Mi Chiisu dimi aa: ‘O cho ko chaaŋaa naa le naŋ nɔ miŋ kaala le. Kɛ ŋ nɔ vɛlɛ miŋ kaala yaamɔɔwaa naa, nduyɛ miŋ mal waŋnda haki a kɔl naa kpou. Te waŋndo tambu pɛ kɔl a num, kɔ naa ndu chua sakpo ma kɔ nyɔɔlu ndu. Nyɛ ŋ yeema mi waŋnda tosal num ndo, ndu num bɛɛ nɔ ni ma tosal nda.’

 Mi Chiisu ke vɛlɛ waŋnda sila sɔviɔɔ a nyɛm kiɔɔŋ okɔɔ. Mbo dimul nda aa: ‘I cho bɔɔ suɛi sɔvɛ le ma wa o chaŋyɛi niŋ a Chɛhowa, mbo hiau kanioŋ nɔɔ tau. Viiya nɔla ma chiimbuu kaniŋ numndoŋ, kɛ wana o wana nɔla mbo chiimbuu chaŋyɛi ŋ nɔ a Chɛhowa ve le. Pɛŋgi buulaŋ bɛndoo le nyɛdiaa ŋ dia wo, nyɛ ŋ kol lo ɔɔ nyɛ ŋ wounuŋ ndo. Tofawɔ youwa. Mi Mɛlɛka tosa a sabu ma sɔla nyɛdiaa tau. Buulaŋ bɛndoo nɔla mbo bɛndi yoomu numndo le paaleŋ lepilɛ bɛɛ le. Loonuŋ maa, Chɛhowa sina nyɛ ŋ hau ba le ndu wo.’

Lepilɛ bɛɛ wanaa wa ndu nilaŋ yaŋɔɔ wa ndaa tuiyɔ waŋndo suɛi maa Chiisu le. Simlachiaa ndaa lepiɛiya ndaa pɛɛku nda sɔɔŋ Chiisu pɛɛku nda muŋ ndoŋ te. Yɛɛ tosa yɛ mi Chiisu chaa waŋnda pɛɛkoo nyɛkɛndɛi? Kanifuule, nyɛ o nyɛ ndoo pɛɛku waŋnda, Chɛhowa o ba ndoo fula ni.