တၢ်မၤလိ ၈၁
တၢ်စံၣ်တဲၤတဲလီၤတၢ်လၢကစၢၢ်ခိၣ်
ဖဲယ့ၣ်ၡူးဃုထၢထီၣ်အတၢ်မၢဖိ ၁၂ ဂၤဝံၤအလီၢ်ခံန့ၣ် အဝဲဟဲက့ၤလီၤဝဲလၢ ကစၢၢ်အခီၣ်ထံးလၢပှၤဂီၢ်မုၢ် အိၣ်ဖှိၣ်ဝဲအလီၢ်န့ၣ်လီၤ. ပှၤဂီၢ်မုၢ်တဖၣ်အံၤဟဲဝဲလၢ ကီၢ်ကၤလံၤလါ, ယူဒၤ, စိၢ်, စံဒိၣ်, စူၤရံ ဒီးလၢယၢ်ဒ့ၣ်ဝၢ်ဘးခီလီၤ. အဝဲသ့ၣ်ဟဲစိာ်ဝဲပှၤဆူးပှၤဆါ ဒီးပှၤလၢတၢ်နါအိၣ်လၢအလိၤလီၤ. ဒီးယ့ၣ်ၡူးမၤဘျါက့ၤ အဝဲသ့ၣ်ခဲလၢာ်လီၤ. ဝံၤဒီးယ့ၣ်ၡူးဆ့ၣ်နီၤလၢကစၢၢ်ခိၣ် ဒီးစးထီၣ်စံၣ်တဲၤတဲလီၤတၢ်လီၤ. ယ့ၣ်ၡူးတဲနၢ်ပၢၢ်အဝဲသ့ၣ်လၢ အဝဲသ့ၣ် မ့ၢ်အဲၣ်ဒိးကဲထီၣ် ကစၢ်ယွၤအတံၤသကိးန့ၣ် ကဘၣ်မၤဝဲတၢ်မနုၤလဲၣ်န့ၣ်လီၤ. ပကဘၣ်သ့ၣ်ညါလၢ ပလိၣ်ဘၣ်ယဟိဝၤယွၤလၢ ပတၢ်အိၣ်မူအပူၤ ဒီးပကဘၣ်အဲၣ်အီၤလီၤ. ဘၣ်ဆၣ် ပမ့ၢ်တအဲၣ်ပှၤလၢပဃၢၤန့ၣ် ပအဲၣ်ကစၢ်ယွၤတသ့စ့ၢ်ကီးဘၣ်. ပကဘၣ်အိၣ်ဒီးတၢ်သးကညီၤ လၢပှၤခဲလၢာ်အဖီခိၣ် ဃုာ်ဒီးပဒုၣ်ပဒါလီၤ.
ယ့ၣ်ၡူးတဲဝဲလၢ– ‘တမ့ၢ်လၢပကဘၣ်အဲၣ်ထဲ ပတံၤသကိးတဖၣ်ဘၣ်. ပကဘၣ်အဲၣ်စ့ၢ်ကီးပဒုၣ်ပဒါ ဒီးပကဘၣ်ပျၢ်ကွံာ် ပှၤဂၤအတၢ်ကမၣ်လၢ ပသးဒီဖျၢၣ်ညါလီၤ. ပှၤတဂၤဂၤ မ့ၢ်သးထီၣ်နၤန့ၣ် လဲၤဆူအအိၣ်တဘျီဃီဒီး ဃ့ပျၢ်နတၢ်ကမၣ်တက့ၢ်. ဒီးဒ်နမုၢ်လၢ်လၢ ပှၤကရ့နၤလၢ တၢ်အဲၣ်တၢ်ကွံအပူၤန့ၣ် ရ့ဒီးအီၤဒ်န့ၣ်တက့ၢ်.’
ယ့ၣ်ၡူးဟ့ၣ်ကူၣ်စ့ၢ်ကီးအဝဲသ့ၣ် ဘၣ်ဃးဒီးကျိၣ်စ့ဒီး တၢ်စုလီၢ်ခီၣ်ခိၣ်လီၤ. ယ့ၣ်ၡူးတဲဝဲလၢ– ‘ပတၢ်ရ့လိာ်သးဒီးယဟိဝၤယွၤန့ၣ် မ့ၢ်တၢ်အရ့ဒိၣ်န့ၢ်ဒံးကျိၣ်စ့လီၤ. နကျိၣ်နစ့န့ၣ် တၢ်ဘျၣ်ဟုၣ်ဝဲသ့လီၤ. မ့မ့ၢ်နတၢ်ရ့လိာ်သးဒီးယဟိဝၤယွၤန့ၣ် ပှၤဟုၣ်န့ၢ်ဝဲတသ့နီတဂၤဘၣ်. နကအီၣ်ဘၣ်အီဘၣ် ဒီးနကကူကသိးဘၣ်ဒ်လဲၣ်ဒ်လဲၣ်န့ၣ် နတဘၣ်သူၣ်ကိၢ်သးဂီၤတဂ့ၤ. ကွၢ်ထိၣ်တဖၣ်တက့ၢ်. ကစၢ်ယွၤ လုၢ်အီၣ်လုၢ်အီအဝဲသ့ၣ် လၢလၢပှဲၤပှဲၤလီၤ. နမ့ၢ်သူၣ်ကိၢ်သးဂီၤတၢ် သနာ်က့ တမ့ၢ်လၢနတၢ်အိၣ်မူကထီထီၣ်ဘၣ်. ဒီးနကဘၣ်သ့ၣ်နီၣ်ထီၣ်လၢ ယဟိဝၤယွၤသ့ၣ်ညါတၢ်လၢ နလိၣ်ဘၣ်တဖၣ်န့ၣ်လီၤ.’
ပှၤဂီၢ်မုၢ်တဖၣ်တနၢ်ဟူဘၣ်ဝဲ ပှၤကတိၤတၢ်ဒ်သိးဒီးယ့ၣ်ၡူးနီတဂၤဘၣ်. အဝဲသ့ၣ်အတၢ်ဘူၣ်တၢ်ဘါခိၣ်နၢ်တဖၣ်န့ၣ် တသိၣ်လိအဝဲသ့ၣ် ဘၣ်ဃးဒီးတၢ်ဂ့ၢ်တဖၣ်အံၤဘၣ်. ဘၣ်မနုၤအဃိ ယ့ၣ်ၡူးမ့ၢ်သရၣ်လၢ အဂ့ၤတဂၤလဲၣ်. မ့ၢ်လၢကယဲၢ်တၢ်လၢ ယ့ၣ်ၡူး သိၣ်လိဝဲန့ၣ် ဟဲလၢယဟိဝၤယွၤအအိၣ်လီၤ.
“ဟံးထီၣ်ယနီၣ်ယိးဘိလၢသုလိၤ, ဒီးမၤလိတၢ်လၢယၤတက့ၢ်. အဂ့ၢ်ဒ်အံၤ, ယသးစူၤ, ဒီးယသးဆီၣ်လီၤ ယသးလီၤ. ဒီးသုကထံၣ်န့ၢ်တၢ် အိၣ်ဘှံးလၢသုသးအဂီၢ်လီၤ.”—မးသဲ ၁၁:၂၉
