Vava kasola ntumwa 12, Yesu wakulumuka vana mongo yo kwenda vana fulu kina kiakutakena ndonga. Wantu awaya batuka kuna Ngalili, Yuda, Turo, Sidone, Suria ye kuna sambu diankaka dia Yodani. Batwasa wantu bamonanga mpasi mu kuma kia mayela ye akaka ana babangikwanga kwa nkuya. Yesu wabawuka yau awonso. I bosi, wavuanda vana ndambu a mongo yo yantika vova. Wayika mana tufwete vanga avo tuzolele kala akundi a Nzambi. Tufwete zaya vo Yave tuvuidi o mfunu yo longoka kunzola. Kansi, ka tulendi vova ko vo Nzambi tuzolanga avo ke tuzolanga wantu ankaka ko. Tufwete zolanga wantu awonso, kana nkutu atantu eto.

Yesu wavova vo: ‘Kufwete zola kaka akundi aku ko. Ofwete zola mpe atantu aku yo loloka wantu ye nsi a ntima yawonso. Avo muntu ufungidi makasi, vana vau wenda mokena yandi yo  lomba e ndoloki. Kadilanga ye akaka nze una ozolanga vo bakadila yaku.’

Yesu wavana mpe wantu luludiku lwambote mu kuma kia mavua ma nza yayi. Wavova vo: ‘O kala nkundi a Yave disundidi o mfunu ke mu kala ye nzimbu zayingi ko. E mivi balenda yiya nzimbu zaku. Kansi, ke vena muntu ko olenda yiya kikundi kiaku yo Yave. Yambula tokana mu kuma kia dia, nua yovo vuata. Tala e nuni. Nzambi okubavananga madia bavuidi o mfunu. E ntokani ke zilendi kukudikila kana lumbu kimosi ko kia zingu. Sungamena vo Yave ozeye kina ovuidi o mfunu.’

Wantu awaya ke basidi wá muntu ko walongelanga nze Yesu. E mfumu zau za mabundu ke babalonganga mambu mama ko. Ekuma Yesu kakadila nlongi anene? Kadi mawonso kalonganga kwa Yave matuka.