Hamulaho wa kuketa baapositola ba 12, Jesu ashetumukela kwa lilundu fa sibaka fone bakubukani batu babañata. Nebazwa kwa Galilea, Judea, Tire, Sidoni, Siria, ni mwa buse bobuñwi bwa Jordani. Nebatisize batu bane bakula matuku ni batu babañwi bane bakatazwa ki madimona. Jesu naabafolisize kaufelaa bona. Cwale aina fafasi kwatuko ni lilundu mi akala kubulela. Naatalusize zeluswanela kueza haiba lubata kuba balikani ba Mulimu. Luswanela kulemuha kuli lutokwa Jehova ni kuituta ka za hae ni kumulata. Kono halukoni kulata Mulimu haiba halulati batu babañwi. Luswanela kuba ni sishemo ni kueza hande batu kaufela, mane nihaiba lila zaluna.

Jesu naaize: ‘Hakusika likana kulata feela balikani bamina. Mutokwa hape kulata lila zamina ni kuswalela batu kuzwelela kwatasaa pilu yamina. Haiba mutu yomuñwi uminyemezi, muye ku yena kapili-pili ni kuyo kupa swalelo. Mueze batu babañwi momubatela kuli bamiezeze.’

 Jesu hape naafile batu kelezo yende ka za lika za kwa mubili. Naabulezi kuli: ‘Ki kwa butokwa hahulu kuba mulikanaa Mulimu kufita kuba ni masheleñi amañata. Lisholi wakona kuuzwa masheleñi amina, kono hakuna yakona kuuzwa silikani samina ni Jehova. Mutuhele kubilaela ka ze mukaca, zemuka nwa, kamba zemuka apala. Hamutalime linyunywani. Mulimu ubonanga teñi kuli linani lico za kuca ka nako kaufela. Kubilaela kukatahisa kuli musike mwapila nako yetelele. Muhupule kuli, Jehova waziba zemutokwa.’

Buñata nebusika utwa kale mutu yabulela sina mwanaabulelezi Jesu. Babahulu ba bulapeli bwabona nebasika baluta litaba zeo. Ki kabakalañi Jesu hanaali muluti yomutuna? Kakuli lika kaufela zanaaluta nelizwa ku Jehova.