Yesu pa kupwa kutonga batumibwa 12, wātūkile pa lūlu wāenda kwādi kwibungile kibumbo kikatampe kya bantu. Bādi batambe ku Ngadilea, Yudea, Tyila, Shidona, Shidea, ne bukila bwa Yodano. Bāmuletēle bantu babela ne bādi basusulwa na bandemona. Yesu wēbabelwile bonso. Kupwa, wāshikata dya ku lūlu wāanza kwibafundija. Wāshintulwile byotufwaninwe kulonga shi tusaka kwikala balunda na Leza. Tufwaninwe kuyuka’mba tusakilwa Yehova, kadi tufwaninwe kwifunda kumusanswa. Inoko ketukokejapo kusanswa Leza shi ketusenswepo bakwetu. Tufwaninwe kwikala biyampe na bantu bonso ne kwibalombola kanye, enka ne balwana netu bene.

Yesu wānenene amba: ‘Kusanswa’nka balunda netu kete kekubwenepo. Tufwaninwe kusanswa ne balwana netu bene, ne kulekela bantu na mutyima umo. Shi ubasanshija muntu, enda ukamumone ponka na ponka ne kumulomba lusa. Longela bakwenu bintu mu muswelo osaka nobe bakulongele’byo.’

 Kadi Yesu wāpele bantu madingi mayampe atala bintu bya ku ngitu. Wānenene amba: ‘Kwikala mulunda na Yehova i kwa kamweno bininge kupita kwikala na lupeto luvule. Mwanda ngivi ukokeja kukwiba lupeto, inoko i kutupu muntu ubwanya kwiba bulunda bobe na Yehova. Leka kuzumbija mutyima pa byakudya, bya kutoma, nansha bya kuvwala. Tala’po bidi toni. Leza witudishanga mafuku onso. Kuzumbija mutyima kekubwanyapo kukulepejeja’ko būmi. Vuluka’mba, Yehova uyukile byosakilwa.’

Bibumbo byādi kebyaivwene kashā muntu ufundija pamo bwa Yesu. Bendeji babo ba bipwilo kebādipo bebafundija bino bintu. Mwanda waka Yesu wādi wibafundija biyampe nenki? I mwanda byonso byaādi wibafundija byādi bitamba kudi Yehova.