Tej otoqxi che jaw tjyoʼn Jesús 12 apóstol, kuʼtz twi witz ex xiʼ toj jun tembʼil jatumel otoq tzʼok kychmon kyibʼ nimku xjal. Otoq che tzaj toj Galilea, toj Judea, toj Tiro, toj Sidón, toj Siria ex tjlajxi nim aʼ Jordán. E tzaj qʼiʼn qe yabʼ ex qeju at juʼẍ toj kyanmi twitz Jesús, ex e kubʼ tqʼanin. Kubʼtzun qeʼ Jesús twi witz ex ok ten xnaqʼtzal kye xjal. Xi tchikʼbʼaʼn kye tiʼ il tiʼj tuʼn tbʼant quʼn qa qaj tuʼn qok te tamiw Dios. Il tiʼj tuʼn tel qnikʼ tiʼj qa at tajbʼen Jehová qe ex qa il tiʼj tuʼn tok qkʼujlaʼn. Noqtzun tuʼnj, mlay tzʼok qkʼujlaʼn Dios qa nya kʼujlaʼn qe txqantl xjal quʼn. Il tiʼj tuʼn qok te tbʼanel ex te tzʼaqli kyukʼil kykyaqil xjal, axpe ikx kyukʼil aj qʼoj qiʼj.

Xi tqʼamaʼn Jesús kye: «Nya oʼkx tuʼn kyok kykʼujlaʼne kyamiwe, ax ikx il tiʼj tuʼn kyok kykʼujlaʼne qe aj qʼoj kyiʼje ex tuʼn tkubʼ kynajsaʼne kyil txqantl tukʼil tkyaqil kyanmiye. Ex qa at jun ma jaw qʼojle tukʼila, txi naja qanil najsama te. Tenx tbʼanel tmoda kyukʼil txqantl ik tzeʼn taja tuʼn tten tbʼanel kymod tukʼila».

 Ax ikx xi tqʼoʼn Jesús tbʼanel nabʼil kyiʼj tiʼchaq at qe. Tqʼama jlu: «Mas nim toklen tuʼn qok te tamiw Jehová twitzju tuʼn tten nim qpwaq. Tuʼnju jaku tzʼel tiʼn jun eleqʼ tpwaqa, noqtzun tuʼnj, mix aʼl jun jaku tzʼel qʼinte tamiwbʼila tukʼil Jehová. Tuʼntzunju, miʼn tzaj bʼaj tkʼuʼja tiʼj twaya, tiʼj tkʼaya ex tiʼj t-xbʼalina. Qʼonk twitza kyiʼj tal pájaro. Kukx in che ok t-xqʼuqin Dios tuʼn tten nim kywa. Maske jaku tzaj bʼaj tkʼuʼja, mlay tzʼanqʼina chʼintl ambʼil. Naʼntza: Ojtzqiʼn tuʼn Jehová alkye at tajbʼen teya».

Mi jun maj otoq tzʼok bʼiʼn jun xjal in yolin ik tzeʼn te Jesús. Aʼyeju nejenel kyoj okslabʼil naʼmxtoq t-xi kyxnaqʼtzaʼn jlu kye xjal. ¿Tiquʼn jun tbʼanelxixtoq aj xnaqʼtzal te Jesús? Tuʼnju tkyaqilju xi t-xnaqʼtzaʼn atztoq tzajni tukʼil Jehová.