Ãlikin an kar Jesus kããlõt rijjilõk ro an 12, ear etal ñan ijo elõñ armej rej pãd ie ioon tol̦ eo. Armej rein rar itok jãn Galili, Judia, Tair, Saidon, Siria, im jãn ijoko iturãjetin Jordan. Rar ãñintok armej ro renañinmej im ro jet me jetõb ettoon ear del̦o̦ñ ñan ippãer. Jesus ear kõmour rein aolep. Innem ear jijet im jino an kwal̦o̦k katak eo an. Ear kõmel̦el̦eik ta ko jej aikuj kõm̦m̦ani bwe jen maroñ jeran Anij. Eaorõk bwe jen kile bwe jej aikuji Jeova ilo mour ko ad im katak ñan yokwe E. Bõtab jeban yokwe Anij el̦aññe jejjab yokwe armej ro jet. Jej aikuj jouj im jim̦we ad kõm̦m̦an ñan aolep ekoba ro rej kõjdate kõj.

Jesus ear ba: ‘Ejabwe ñan baj yokwe wõt ro jeram̦ im m̦õttam̦. Kwõj aikuj bar yokwe ro rej kõjdate eok im m̦oolin jol̦o̦k an ro jet bõd jãn bũruom̦. El̦aññe juon ej illu ippam̦, m̦õkaj im etal in jol̦o̦k am̦ bõd ippãn. Kõm̦m̦an ñan ro jet ãinwõt am̦ kõn̦aan bwe ren kõm̦m̦an ñan kwe.’

 Jesus ear bareinwõt lel̦o̦k ñan armej ro naanin kakapilõklõk ko rem̦m̦an kõn jããn im m̦weiuk. Ear ba: ‘Eaorõkl̦o̦k ad jem̦jerãik Jeova jãn an lõñ ad jããn. Juon riko̦o̦t emaroñ ko̦o̦ti jããn ko am̦, ak ejjel̦o̦k juon emaroñ ko̦o̦te jem̦jerã eo am̦ ippãn Jeova. Jab inepata kõn ta kwõnaaj m̦õñã, idaak, ak ballim̦. L̦õmn̦ak m̦õk kõn bao in mejatoto. Aolep iien Anij ej lale bwe en wõr kijeer m̦õñã. Am̦ inepata eban kõm̦m̦an bwe en aetokl̦o̦k am̦ mour. Keememej bwe Jeova ejel̦ã ta ko kwõj aikuji.’

Armej ro rejjañin kar roñ an juon katakin ãinwõt kar Jesus. Rũtõlin kabuñ ro aer ãinwõt Parisi im Skraib ro, rejjañin kar katakin er kõn men kein. Etke Jesus ear juon eo elukkuun jel̦ã katakin? Kõnke aolep men ko ear katakin armej ro kaki rar itok jãn Jeova.