Mu nima ya ku hangula vapostolo 12, Yesu ua sikumukile ku muncinda na ku ya ku cihela kua likunguilile civunga ca kama ca vantu. Vantu va keleko va tundile ku Ngalileya, Yunda, Tile, Sindone, Silia na ku vihela vikuavo via mu sinia lia Yondau. Va nehele vantu va kele na ku vavala, kaha vakuavo va kele na vandemone. Yesu ua va kangusile vose. Mu nima yaco, Yesu ua tumamene ha muncinda, kaha ua putukile ku longesa. Ua lomboluele vi tu hasa ku linga nga tu tonda tu pue vavusamba va Njambi. Tua pande ku tantekeya ngecize Yehova ua tondeka cikuma kuli etu kaha tua pande ku mu lema. Vunoni ka tu hasa ku lema Njambi, nga ka tu leme vakuetu. Tua pande ku vuila vantu vose ngozi, cipue vaze va pua vitozi vetu.

Yesu ua handekele ngueni: ‘Ka ua pandele lika ku lema vavusamba vove. Ua pande naua ku lema vitozi vove na ku ecela vantu na mutima uove uose. Nga muntu na ku nienguela, ya vuasi-vuasi kuli ikeye na ku mu vundila a ku ecele. Muose mu u tonda vakuenu va ku lingemo, nove va lingemo.’

 Yesu ua hele naua cimamuna ca cili ku tuala vupite, ngueni: ‘Ca pua ca seho ya kama ku pua vavusamba va Yehova ku hiana ku kala na vimbongo via vingi. Muomu cizi a hasa ku punda vimbongo viove, vunoni na umo uahi a hasa ku punda vusamba vuove na Yehova. Kati ume mutima ku tuala ha vika u ka-lia , ku nua ni ku zala. Tala tuzila va muilu. Njambi ntsimbu yose ue ku linga cose mu ku va lisa. Ku uma mutima ka ci ka vueza litangua ku miaka ya muono uove. Vuluka ngecize, Yehova a tantekeya vi ua tonda.’

Mbunga ya vantu va kele kuze kanda va ci ivueho laza muntu ueka ua handekele ngeci mua Yesu. Muomu vakuluntu vavo va malombelo ka va va longesele viuma viaco. Omo lia vika Yesu ua puile mulongisi ua kama? Muomu viuma viose via longesele via tundile kuli Yehova.