Kema Jesús ya kintlapejpenijtoya iapóstoles, temok tlen nopa tepetl uan yajki kampa mosentilijtoyaj miakej maseualmej. Itstoyaj maseualmej tlen Galilea, Judea, Tiro, Sidón, Siria uan tlen ne seyok nali tlen nopa ueyatl Jordán. Kinuikatoyaj katli mokokouayayaj uan katli kintlaijiyouiltiyayaj amo kuali ajakamej, uan Jesús kinchikajki. Teipa moseuik tlachikiltipa uan pejki kinkamauia maseualmej, kiniljuik tlake moneki tijchiuasej tlaj tijnekij timouampojchiuasej iuaya Jehová. Kiijtok moneki tijkauasej Jehová ma techyakana uan moneki tikiknelisej. Nojkia kiijtok tlaj amo tikinikneliaj maseualmej amo uelis tikiknelisej toTeotsij. Uan maske sekij elisej tokualankaitakauaj, moneki tikinchiuilisej tlen kuali.

Jesús kiijtok: “Amo san xikiniknelikaj inmouampoyouaj, nojkia katli inmechkualankaitaj uan xikintlapojpoljuikaj ika nochi inmoyolo. Uan tlaj se akajya kualani mouaya, nimantsi xikiljuiti ma mitstlapojpoljui. Xikinchiuili sekinok kej tijnekiskia ma mitschiuilikaj”.

 Jesús nojkia kiijtok kenijkatsa kinamiki tikitasej tlamantli tlen tijtekiuiaj ipan tonemilis. Kiijtok: “Tlauel ipati timouampojchiuasej iuaya Jehová uan amo tlaj tijpiasej miak tomij pampa nopa tomij uelis techichtekilisej. Uan tlaj kuali timouikaj iuaya Jehová, nopa amo aka uelis techkixtilis. Yeka, ayokmo ma mitstekipacho tlake tijkuas, tlake tikis o tlake timokentis. Xikinita piltototsitsij. ToTeotsij nochipa kinmokuitlauia yeka nochipa kipiaj tlen kikuasej. Tlaj timotekipachos, amo kichiuas uejkaua xiitsto. Xikilnamiki: Jehová nochipa kimati tlake mitspoloua”.

Maseualmej amo kema kiitstoyaj se maseuali katli kuali tlamachtiyaya kej Jesús, pampa nopa tlayakananij amo kiampa kinmachtiyayaj. ¿Kenke kuali tlamachtiyaya? Pampa tlamachtiyaya tlen Jehová kimachtijtoya.