Satepan ke kinixpejpenak 12 itatitaniluan, Jesús temok itech tepet uan kinajsito miakej taltikpakneminij. Yejuan ualeuayaj Galilea, Judea, Tiro, Sidón, Siria uan oksekopa itech ueyiat Jordán. Kinualkuikej akin mokokouayaj uan akin amokuali ejekamej kintajyouiltiayaj, uan Jesús kinpajtij nochin. Ompa, motalij uan peuak kinmachtia taltikpakneminij. Kinmelauilij toni moneki tikchiuaskej komo tiknekij kuali timouikaskej iuan Dios. No kiniluij ke moneki tikajsikamatiskej ke moneki maj Jiova techixyekana uan tiktasojtaskej, sayoj ke amo ueli tiktasojtaj komo amo tikintasojtaj taltikpakneminij. No tamachtij ke moneki tiyeskij tiyolkualmej uan timelaujkej iniuan nochin, hasta iniuan akin techtauelitaj.

Jesús kijtoj: “Amo sayoj xikintasojta motasojikniuan, ta no akin mitstauelitaj uan yekmelauj xitetapojpolui. Uan komo aksa kualani mouan, niman xikiluiti maj mitstapojpolui. Xikinchiuili oksekin tein tikuelita maj mitschiuilikan tejua”.

 Jesús no kuali kinyolmajxitij keniuj monekia kiitaskej tomin uan okseki taman. Yejua kijtoj: “Okachi moneki kuali se mouikas iuan Jiova ke se kipias miak tomin. Porin se tachtekkej uelis mitskuilis tomin, sayoj ke amo akin uelis mitskuilis mokuali uikalis iuan Jiova. Yejua ika, amo ika ximotekipacho tein tikuas, tein titayis oso tein timotalilis. Xikinita tototsitsin. Dios nochipa kiita maj kipiakan tein kikuaskej. Maski timotekipachos, amo tinemis okachi tonalmej. Xikelnamiki: Jiova nochipa kimati toni mitspoloua”.

Taltikpakneminij amo keman kikaktoyaj aksa maj tajto kemej Jesús. Taixyekananij itech taneltokalis amo kinmachtijkaj nejon. ¿Keyej Jesús tel kuali tamachtiaya? Porin nochi tein tamachtiaya ualeuaya itenkopa Jiova.