Aamanleiye waathanla arummwa 12, Yesu aakhuruwa va mwaako aya nipuro yaarivo achu ancipale. Awo yaaruule o Kalileya, Yuteya, Tire, Sitoniya, Siriya ni okhopela wa Yortano. Awo yaahaaruuha areca ni yaale yaaphariwe ti masololo. Yesu aahaapenuxa oothene. Voocharela Yesu aakiraathi muxerexere mwa mwaako nave aapacerya ohusiha. Owo aaloca echu nnaphwanelaahu weera wi nikhale asinthamwene a Muluku. Nnaphwanela osuwela wi ninnachuna nikhaviheryo na Yehova ni omusivela yoowo. Nyenya haniwerya omusivela Muluku nniiha nihaasivelaka akina. Niweereleke yaphaama achu oothene, ophitaanyerya amwiicani ahu.

Yesu aahi: ‘Honaakhwana pahiru waasivela asinthamwene ahu. Naasiveleke tho amwiicani ahu ni waakhurumuwela achu ni murima woothene.’ Wakhala wi muchu oonyeenyeya ni weyaano, oye wa yoowo nave omveke nikhurumuwelo. Oweereleke akina echu onachunaawe wi weereliweke.

 Yesu aavaha tho ekano yaphaama vooloca sa ichu soomwiilini. Owo aariye: ‘Ti yaphaama okhala nthamwene a Yehova opwaha okhalano ikhorowa sawaaca. Mpava onnawerya wiiya ikhorowa, nyenya hanii awerye wiiya onthamwene ni Yehova. Mucharuwe wuukhuwa ni yoolya, yoowurya naari yoowara. Onani ipalame. Muluku onnavaha yoolya mahiku oothene. Wuukhuwa honaaceererya olekela wa okumi. Muroromele wi Yehova oosuwela ichu sinoothowaani.’

Achu hiyantonko omwiiwa muchu ahusihaka ntoko Yesu. Asitokweene a ikerexa hiyaahusiha ichu seiya. Ntakhara heeni Yesu aari muhusiha aphaama? Nthowa nawi soothene aaloceiye sarweela wa Yehova.