Daalʼaadii 12 yiltʼéego náyiizlááʼ bikéédóó Jesus éí dziłgi diné áłah silı̨́įʼii neineeztą́ą́ʼ. Gálilii, Judíya, Táir, Sáídan, Síriya, Jórdan tooh wónaanídę́ę́ʼ diné náhaskai. Bitsʼíís bąąh dah nahazʼánígíí áádóó demons atídabiłʼínígíí éí tʼáá átʼé Jesus náyííłdzííʼ. Jesus jineezdáago, God haitʼéego bééhozhdoosįįł bee nízhdíníitą́ą́ʼ. Jiihóvah ayóóʼííníʼníigo bídin niidlı̨́įgi baa ákoniidzin doo. Diné doo ayóóʼájóʼníígóó éí God doo ayóóʼájóʼníi da. Diné tʼáá ałtso, niheʼanaʼí ndi, baa dajiinohbaʼ, índa aheełtʼéego baa nitsídaakees.

Jesus ání: ‘Doo nihikʼis tʼéiyá da, ndi nihidaʼanaʼí ałdóʼ ayóóʼádeínóhʼní. Nijéí tłʼááhdę́ę́ʼ aa náhidíʼaah. Háiida bíniʼ yiniłʼaʼgo, shaa nidiníʼaah bididííniił. Diné shichʼįʼ ádaaníił doo danohsinígíí, nihí ałdóʼ ákótʼéego bichʼįʼ ádaahnííł.’

Jesus éí naalyéhé hazhóʼó baa nitsáhákeesgi yee naʼneeztą́ą́ʼ. Ání: ‘Jiihóvah bił akʼis ídlı̨́įgi éí naalyéhé biláahdi ílı̨́. Aniʼįįhii éí  nibéeso yidínóoʼįįł, ndi Jiihóvah bił ałkʼis ídlı̨́įgi éí doo háiida néidínóoʼįįł da. Doodı̨́įłii, doodlı̨́įłii índa nihiʼééʼ tʼáadoo baa danihíniʼí. Tsídii baa nitsídaahkees, God banáʼáłtsoʼgo doo dichin danilı̨́į da. Niʼdiiłʼáii éí neʼiinaʼ doo łaʼ jı̨́ yineididooʼáał da. Béénílniih, Jiihóvah éí haʼátʼíí shı̨́ı̨́ bídin nílínígíí bił bééhoozin.’

Jesus naʼnitinígíí doo łahda ákótʼéego naʼnitingo dazhdiitsʼı̨́įh da ńtʼééʼ. Oodląʼ yá naazíinii éí doo kótʼéego nidazhʼnitin da. Haʼátʼíí biniinaa Jesus naʼnitin yiyiichįįhii nilı̨́ı̨́ ńtʼééʼ? Jó, Jesus yee naʼnitinígíí éí Jiihóvah bitsʼą́ą́dę́ę́ʼ átʼé.