Nodäm daut Jesus sikj de 12 Apostel jewält haud, kjeem dee vom Boajch rauf no eene Städ, wua eene Häad Menschen toop wia. Dee wieren von Galiläa, Judäa, Tierus, Sidon, Sierien un von de aundre Sied Jordan. Dee brochten Kranke un soone, waut von beese Jeista jekjwält worden, un Jesus heeld dee aula. Dan sad dee sikj opp eenen Boajch dol un funk aun to räden. Hee muak daut dietlich, woo eena kunn Gott sien Frint sennen. Hee säd, wie motten vestonen, daut ons daut aun Jehova fält un dän lieren to leewen. Oba wie kjennen Gott nich leewen, wan wie aundre Menschen nich leewen. Wie sellen aule leeftolich un rajcht behaundlen, mau rajcht onse Fiend.

Jesus säd: “Daut rieekjt nich too, bloos june Frind to leewen. Jie motten uk june Fiend leewen un aundre von Hoaten togood hoolen. Wan sikj wäa äwa junt oajat, dan got fuaz no dän un doot junt entschuljen. Siet soo to aundre, aus dee sellen to junt sennen.”

 Jesus jeef de Menschen uk gooden Rot äwa tietelje Sachen. Hee säd: “Daut es bäta, Jehova toom Frint haben aus väl Jelt haben. Jun Jelt kjennen se junt fuatstälen, oba kjeena kaun junt Jehova wajchnämen. Sorcht junt nich mea, waut jie äten, drinkjen ooda auntrakjen sellen. Kjikjt no de Väajel. Gott sitt doano, daut dee emma jenuach to äten haben. Derch Sorjen kjenn jie jun Läwen nich eenen Dach velenjren. Denkjt doaraun, Jehova weet, waut junt fält.”

De Menschen hauden noch kjeenmol ea wäm hieet soo räden aus Jesus. Dee äare Gloowesleidasch hauden dee soont nich jelieet. Wuarom wia Jesus soon gooda Liera? Wäajen daut aula von Jehova kjeem, waut hee lieed.