Doce apostolcunata agllashca qꞌuipaca Jesusca urcumanta uriyamushpami achca tandanacushca gentecunapajman chayarca. Chai gentecunaca Galilea, Judea, Tiro, Sidón, Siria, Jordán yacu ladomantapishmi shamurcacuna. Paicunaca ungushcacunata, demonio japishcacunata apamujpimi Jesusca tucuicunata jambirca. Qꞌuipaca Jesusca tiyarishpami Diospaj amigo cangapaj imata rurana cashcata yachachi callarirca. Diospaj amigo cangapajca ñucanchij causaita pushachunmi saquina canchij. Shinallataj paita cꞌuyangapajca paimantami yachana canchij. Diosta mana cꞌuyashpaca shujtajcunatapish mana cꞌuyai tucushunchu. Chaimantami tucuicunapaj allita rurana canchij. Ñucanchij enemigocuna cajpipish allimi tratana canchij nishpami yachachirca.

Jesusca, ‘amigocunallataca mana cꞌuyanachu cangui. Enemigocunatapish cꞌuyanami cangui. Shungumantami perdonana cangui. Chashnallataj pi, canhuan pꞌiñarijpica chai ratomi paihuan  alli tucuna cangui. Canta ima shina tratachun munashca shinami shujtajcunatapish tratana cangui’ nircami.

Shinallataj Jesusca, ‘cullquita cꞌuyanapaj randica Diostami cꞌuyana cangui. Cullquitaca maijanpish shuhuai tucunmi. Pero Diosmantaca pi mana caruyachi tucungachu. Chaimanta micunamanta, churanamanta mana sustarinachu cangui. Pajaritocunata ricui. Diosca paicunataca siempremi cuidaracun. Micuna ama illachunpish mana saquinchu. Yalli sustarishpaca mana ashtahuan huatacunata causanguichu. Diosca imalla minishtishcacunataca allimi yachan’ nircami.

Jesús ima shina yachachishcata uyashpami gentecunaca mancharircacuna. Religionta pushajcunaca mana chashna yachachijcunachu carca. ¿Imamantataj Jesusca alli yachachij carca? Tucui yachachishcacunaca Diosmantami shamurca.