Jesusqa 12 apostolninkunata akllaruspanmi achkallaña runakunapa kasqanman rirqa. Chay achkallaña runakunaqa hamurqakum Galileamanta, Judeamanta, Tiromanta, Sidonmanta hinaspa Siria lawmanta. Hamurqakutaqmi Jordan mayupa wak lawninmantapas. Chaypim Jesusqa unquqkunatawan demoniopa ñakarichisqankunata sanoyachirqa. Chaymantapas, urqupa waqtanpi tiyaykuspanmi yachachirqa Jehova Dioswan imaynata kuyachikunamanta hinaspa Jehova Diosta kuyaspalla kusisqa kawsakunamanta. Arí, runamasinchikta mana kuyaspaqa manam Jehova Dios kuyaytaqa atichwanchu.

Jesusqa nirqataqmi: “Chiqnisuqnikichiktapas kuyanaykichikmi, hinaspam sunqumanta pampachanaykichik. Pipas qanwan piñakuruptinqa chayllam allinyanakunayki, aylluykita hinataqmi pitapas kuyanayki”, nispa.

 Jesusqa nirqaraqmi: “Jehova Diosta kuyaymi aswan allinqa qullqilla maskaymantaqa. Qullqitaqa suwapas qichurusunkimanmi, Jehova Dios kuyasqaykitam ichaqa pipas mana qichusunkichu. Diosqa alton pawaqkunamanpas mikuchinmi, chaynaqa amayá llakikuychu mikuymantawan pachamantaqa. Llumpayta llakikuspapas manam una-unay wata kawsakuytaqa atinkichu. Diosqa pisipususqaykiman hinam imatapas qusunki”, nispa.

Jesus hinaqa manam pipas yachachirqachu nitaq religionpi punta apaqkunapas, chaymi runakunaqa Jesuspa yachachisqanwan uyarayarurqakuraq. Chaynaqa, ¿imanasqataq Jesusqa sumaqta yachachirqa? Jehova Dios yachachisqanraykum.