Jesusca 12 apostolcunata agllashca jipaca, urcumanda urai shamushpami ashtaca gentecuna tandanajushca pushtuman rirca. Chai gentecunaca Galilea, Judea, Tiro, Sidón, Siria, Jordán yacu manñacunapi tiaj shuj llactacunamandapashmi shamushca carca. Paicunaca nanaicunahuan caj gentecunata, ayacuna llaquichijpi sufrijuj gentecunatapashmi apanajurca. Chaipimi Jesusca tucuicunata jambirca. Shinallata chai urcu laderapimi gentecunaman Taita Diospa ali amigo cangapaj imatalla rurana cashcatapash yachachijurca. Ñucanchipash Jehová Diosta minishtishcata, paita tucui shunguhuan juyanataca alimi yachajuna canchi. Shinapash shuj gentecunata na juyashpaca, Jehová Diostaca na juyaita ushanchichu. Ñucanchicunaca tucuicunahuan ali cashpa, imatapash ali rurajcunami cana canchi. Ñucanchita na ricunayachij gentecunahuanbashmi shinallata cana canchi.

Jesusca nircami: Cangunapa cumbacunata juyashpapash, cangunata fiñajcunatapash tucui shunguhuanmi perdonana canguichi. Pipash cangunahuan culirajpica uchallami perdonahuai nina canguichi. Shinallata ‘imashnami shuj gentecuna cangunaman aliguta rurachun munanguichi, chashnallatami cangunapash rurana canguichi’ nishpa.

 Jesusca ñucanchi ima charishca cosascunamandapashmi ali consejocunata curca. Jesusca nircami: Charij charij canapa randica Jehová Dioshuan ali canami ashtahuan importante can. Culquitaca shuhuacuna shuhuaita ushanmi, shinapash Jehová Dioshuan ali amigo canataca pipash na shuhuaita ushanllu. Chaimandami micunamanda, imatapash ufianamanda, ima ropata churajunamandaca na yapata preocuparijunachu cangui. Urpigucunata ricui, Jehová Diosca paicuna micunaguta charichunbashmi cuidariajun. Yapata preocuparishpapash ashtahuan causaitaca na ushashunllu. Caitaca ama cunganguichu, Jehová Diosca can imata minishtijushcatapash alimi yachan nishpa.

Chai gentecunaca Jesús yachachishca shina shujcuna yachachijtaca nunca na uyashcarcachu. Chai tiempopi iglesiacunata ñaupaman pushajcunaca chaicunata na yachachinllu carca. ¿Imamandata Jesusca shina alipacha yachachin carca? Paica Jehová Dios yachachishcatami yachachijurca.