О Исус биринѓа пле 12 апостолен, хем пало адава хулило тари планина ко јекх тхан коте со сине бут мануша. Ола але тари Галилеја, Јудеја, Тир, Сидон, Сирија хем тари јавер страна тари река Јордан. Ола анѓе пеа мануша со сине насвале хем мучиме таро демонија. О Исус сасљарѓа саринен, пало адава бешља хем почминѓа те сикавел лен. Ов објаснинѓа со ваљани те кера ако мангаја те ова паше е Девлеа. Ваљани те ова свесна кај нашти бизо Јехова хем кај ваљани те сикљова те манга ле. Ама, нашти те манга е Девле ако на мангаја е манушен. Мора те ова шукар хем фер сариненцар, чак околенцар да со на понашинена пе аменцар шукар.

О Исус вакерѓа: „На ваљани те манген само тумаре амален. Ваљани те манген тумаре душманен да хем те простинен е манушенге таро вило. Ако некој хољанела туменге, сигате џан ки лесте хем извининен тумен. Е јаверенцар понашинен тумен сар со мангена ола те понашинен пе туменцар“.

 О Исус исто аѓаар денѓа шукар советија е манушенге башо материјална буќа. Ов вакерѓа: „Поважно тано те ове амал е Јеховаја него те ове бут барвало. О паре шај те чорен лен тутар, ама о амалипе е Јеховаја никој нашти те чорел ле тутар. Чхинавен те секиринен тумен со ка хан, со ка пиен или со ка уравен. Дикхен е чириклен. О Девел грижинѓа пе секогаш те овел лен хајбаске. О секирацие нане те продолжинен то живото. Ма бистрен, о Јехова џанела со ваљани туменге“.

О мануша прво пути шунена сине некој те сикавел сар о Исус. Ленгере верска водачија на сикавена лен сине башо асавке буќа. Соске о Исус сине добором шукар учители? Соске са со вакерела сине авела таро Јехова.