O Isus biringja ple 12 apostolen, hem palo adava hulilo tari planina ko jekh than kote so sine but manuša. Ola ale tari Galileja, Judeja, Tir, Sidon, Sirija hem tari javer strana tari reka Jordan. Ola angje pea manuša so sine nasvale hem mučime taro demonija. O Isus sasljargja sarinen, palo adava bešlja hem počmingja te sikavel len. Ov objasningja so valjani te kera ako mangaja te ova paše e Devlea. Valjani te ova svesna kaj našti bizo Jehova hem kaj valjani te sikljova te manga le. Ama, našti te manga e Devle ako na mangaja e manušen. Mora te ova šukar hem fer sarinencar, čak okolencar da so na ponašinena pe amencar šukar.

O Isus vakergja: „Na valjani te mangen samo tumare amalen. Valjani te mangen tumare dušmanen da hem te prostinen e manušenge taro vilo. Ako nekoj holjanela tumenge, sigate džan ki leste hem izvininen tumen. E javerencar ponašinen tumen sar so mangena ola te ponašinen pe tumencar“.

 O Isus isto agjaar dengja šukar sovetija e manušenge bašo materijalna bukja. Ov vakergja: „Považno tano te ove amal e Jehovaja nego te ove but barvalo. O pare šaj te čoren len tutar, ama o amalipe e Jehovaja nikoj našti te čorel le tutar. Čhinaven te sekirinen tumen so ka han, so ka pien ili so ka uraven. Dikhen e čiriklen. O Devel grižingja pe sekogaš te ovel len hajbaske. O sekiracie nane te prodolžinen to životo. Ma bistren, o Jehova džanela so valjani tumenge“.

O manuša prvo puti šunena sine nekoj te sikavel sar o Isus. Lengere verska vodačija na sikavena len sine bašo asavke bukja. Soske o Isus sine doborom šukar učiteli? Soske sa so vakerela sine avela taro Jehova.