Na peko ti so Jésus asoro abazengele ti lo 12, lo descend hoto ni na lo gue na mbeni place so gbâ ti azo abungbi dä. Azo ni alondo na Galilée, Judée, Tyr, Sidon, Syrie nga na mbage ti Jourdain. Ala ga na azo so ayeke na kobela nga na ambeni so asioni yingo asara ye ti ngangu na ala. Jésus asava ala kue. Na pekoni lo duti na ndö ti mbeni kete hoto ni na lo komanse ti sara tënë. Lo fa ye so a lingbi e sara tongana e ye ti ga akamarade ti Nzapa. A lingbi e hinga so e bezoin Jéhovah nga a lingbi e manda ti ye lo. Me tongana e ye amba ti e ape e lingbi nga ti ye Nzapa ape. E doit ti sara nzoni bê na azo nga e sara ye na lege ni na zo kue, même na awato ti e.

Jésus atene: ‘Ti ye gï akamarade ti mo alingbi ape. A lingbi mo ye nga awato ti mo nga mo pardonné azo na bê ti mo kue. Tongana mbeni zo asara ngonzo na terê ti mo, gue mo bâ lo droit na hunda pardon. Sara ye na azo tongana ti so mo ye ti tene azo asara ye na mbage ti mo.’

 Jésus amû nga ambeni wango na ndö ti tënë ti mosoro. Lo tene: ‘A yeke kota ye mingi ti duti kamarade ti Nzapa ahon ti duti na gbâ ti nginza. Mbeni zo ti nzi apeut ti nzi nginza ti ala, me zo oko alingbi ti nzi songo ti ala na Jéhovah ape. Ala zia ti gi bê ti ala na ndö ti ye so ala yeke te, wala ye so ala yeke nyon wala ye so ala yeke yü ande. Ala bâ andeke. Nzapa ayeke bâ si ala wara kobe alingbi na ala. Gingo bê alingbi pëpe ti pusu lango ti fini ti ala na devant teti lango oko. Ala girisa ape, Jéhovah ahinga ye so ala bezoin ni.’

Azo ni ade ti mä lâ oko mbeni zo asara tënë tongana ti Jésus so ape. Akota zo ti Nzapa ti ala afa na ala aye ni so ape. Ngbanga ti nyen la Jésus ayeke mbeni kota wafango ye tongaso? Ngbanga ti so aye kue so lo fa alondo na Jéhovah.