Yesuusi 12 soqqamaasine doori gedensaanni ilaala haˈri; hakkiicho lowo manni gamba yiino. Hakku manni Galiilunni, Yihudunni, Xiroosinni, Sidooni gobbanninna Yordaanoosi raginni dayinoho. Insa xiwaminonna bushu ayyaani einonsa manna haadhe abbitino. Yesuusi xiwantinore baala hursino. Hakkiinni ilaalu aana ofolle rosiisa hanafi. Isi Maganu jaala ikkate maa assa hasiissannonkero kulino. Yihowa kaaˈlo hasiissannonketa afanna iso baxa hasiissannonke. Ikkollana manna banxeemmokkiha ikkiro, Magano baxa didandiineemmo. Manna baalaho, wole agurina baarigaarrankera nafa shaqqadda ikkanna danchare assa hasiissannonke.

Yesuusi togo yiino: ‘Jaallaˈne calla baxa dihasiissannoˈne. Baarigaarraˈneno baxa hasiissannoˈne, hattono manna godowinta gatona yiiyye. Giwantinoonni manchi nooro, keeshshitinikki martine maaro xaˈmidhe. Mannu assaˈnera hasidhinannire kiˈneno insara assensa.’

 Yesuusi manna jirote daafirano amaalino. Isi togo yiino: ‘Lowo jiro afiˈrantenni Yihowa jaala ikka woyyitanno. Jiroˈne mooraanchu moorara dandaanno; Yihowa ledo nooˈne jaalooma kayinni mittuno moorara didandaanno. “Maa inteemmo? Maa angeemmo? Woy maa uddiˈneemmo?” yitine yaaddinoonte. Hanni cea laˈe. Maganu insara duuchanka woyite ittanno sagale aannonsa. Yaaddine diriˈne aana mitto barra nafa lexxa didandiitinanni. Yihowa mayi hasiisannoˈnero afino.’

Hakko noo manni, Yesuusi gede rosiisanno mancho horo afe diegennino. Farisootunna seeru rosiisaano mannaho Yesuusi rosiisinonsare dirosiissanno. Yesuusi worba rosiisaancho ikkinohu mayiraati? Korkaatuno isi rosiisinori baalu Yihowa kulinosireeti.