Su apang bọu němile 12 rasulẹ̌, Yesus limintụ bọu wul᷊udẹ̌ sarang sěmbaụ tampạ. Lawọ taumata seng nẹ̌komol᷊ẹ̌ su tampạ ene. I sire ini bọu Galilea, Yudea, Tirus, Sidon, Siria, dingangu bọu sěmběkang Sal᷊ụ u Yordan. I sire nẹ̌bawa taumata masakị dingangu taumata apang nisigěsạkengu rohkẹ̌ dal᷊akị. Yesus napakapia si sire kěbị. Bọu ene, i sie kimaiang su sěmběkang bul᷊udẹ̌ kụ něnětạ něněntiro. I sie nělahẹ apa harusẹ̌ koateng i kitẹ tadeạu makoạ hapị u Mawu. I kitẹ harusẹ̌ ahạkeng i Yehuwa dingangu kuměndagẹ̌ si Sie. Katewe, i kitẹ tawe makakoạ kuměndagẹ̌ si Yehuwa mạeng tawe kuměndagẹ̌ taumata wal᷊inẹ. I kitẹ harusẹ̌ mapia dingangu maadilẹ̌ su kěbị taumata, sarang lai si sire apang dal᷊akị měkoạ si kitẹ.

Yesus nẹ̌bera, ’Abe kětạeng kuměndagẹ̌ su hapị i kamene. Kěndagẹ̌ko lai sědụ i kamene dingangu pěgělị ampung dingangu kaguwạu naungu. Mạeng piạ u nẹ̌pědu si kamene, dakọe pẹ̌sombang dingange kụ pẹ̌dorong ampung. Kere cara i kamene mapulu koateng, pěkoạ lai kerene si sire.

 Yesus lai něgělị sasasa mapaelẹ̌ soal u arětạ. I sie nẹ̌bera, ’Mariadi hapị i Yehuwa ene limembong kapaelange sul᷊ungu piạ lawọ doitẹ̌. Tahatako botonge makatako roitu, katewe tawẹ apa makatako pẹ̌dal᷊ahapịu dingangi Yehuwa. Abe turusẹ̌ guměnggang soal u apa sarung kanengang, inungang, dingangu paketang i kamene. Pěmandạe manga burung. Mawu turusẹ̌ měgẹ̌gělị kaěng si sire. Mạeng i kamene guměnggang, biahi kamene tawe matamba manandụ. Pẹ̌tahěndungke, Yehuwa masingkạ kebutuhan i kamene.’

Komol᷊angu taumata ene bědang tawe nakaringihẹ̌ piạ u nẹ̌bisara kere i Yesus. Těmbonangu agama, ene kai tau Farisi dingangu mapapandeng Toratẹ̌, tawe něněntiro manga hal᷊ẹ̌ kerene si sire. Kawe nụe i Yesus ene kai guru kapaelange? Ual᷊ingu kěbị apa nitěntirone asal᷊e kai bọu i Yehuwa.