Nda̱wa̱á rí Jesús niraʼwíin mbá 12 apóstoles, nigajta̱a̱ náa kúbá ikhú ni̱jkha̱ náa nigimbíin mbaʼin xa̱bu̱. Niguwáʼ xa̱bu̱ bi̱ kuwa náa Galilea, Judea, Tiro, Sidón, Siria ga̱jma̱a̱ imbo̱o̱ ridoo mañu Jordán. Niguwáʼ kudiin xa̱bu̱ bi̱ naʼniún nandii o bi̱ numíniiʼ ga̱jma̱a̱ numún xa̱bu̱ wéñiʼ, ga̱jma̱a̱ Jesús niʼni thanún xúgínʼ. Ikhú nigi̱ʼi̱ náa níjniúu kúbá ga̱jma̱a̱ nigíʼdu̱u̱ niʼthún xa̱bu̱. Niʼthún ndiéjunʼ rí gíʼmaa muʼni á mu nandulúʼ mambaxúlúʼ gajmiúlú Dios. Ndayóoʼ mbuʼyáá rí ndayúlú Jeobá ga̱jma̱a̱ ndayóoʼ majmañulúʼ maʼndulú kuʼyáá. Mú xándoo maʼndulú kuʼyáá Dios á mu na̱nguá eyulú kuʼñúún eʼwíínʼ xa̱bu̱. Gíʼmáanʼ manindxu̱lúʼ xa̱bu̱ májáánʼ ga̱jma̱a̱ muʼniu̱u̱n rí jmbu xúgínʼ, asndu bi̱ guáʼdáanʼlu sia̱nʼ.

Jesús niʼthí: “Raʼkháa i̱ndó maʼnda̱ʼ xtañún bi̱ nambáxa̱ʼ gajmiáanʼ, gíʼmaa maʼnda̱ʼ xtañún mangiin bi̱ nakiʼníin kuyaaʼ ga̱jma̱a̱ matani mba̱a̱ a̱jkia̱nʼ. Ga̱jma̱a̱ á mu mbáa nakiʼnáa kaʼyaʼ, ayuʼ nacha̱, ga̱jma̱a̱ atanda̱ʼa̱a̱ rí maʼni mba̱a̱ a̱jkiu̱u̱n kaʼyaʼ. Ataniu̱u̱n eʼwíínʼ xó má eyaʼ muniaʼ ikháánʼ”.

 Jesús ma̱ngaa nixná májánʼ xtágabu ga̱jma̱a̱ numuu xúgíʼ rí kuaʼdáá. Niʼthí: “Itháan gíʼdoo numuu mambaxúlúʼ gajmiúlú Jeobá ki xóo muguaʼdáá wéñuʼ mbújkha̱a̱. Numuu rí mbáa kuʼwáʼ ma̱ndoo maʼni kúwáʼ mbújkha̱ʼ, mú nimbáa xándoo maríyaa kaʼyááʼ rí natambáxaʼ ga̱jma̱ʼ Jeobá. Ikha jngó ní xaxmiéjuanʼ ga̱jma̱a̱ numuu ganitsu, rí migi̱i̱n ga̱jma̱a̱ xtíin. Atañún ñu̱ʼu̱. Dios nañewu̱u̱n má xúʼko̱ mu maguaʼdáá ganitsu. Maski ajndu maxmiéjuanʼ, xáraxtaa itháan. Garmáʼáan a̱jkia̱nʼ: Jeobá ndaʼyoo rí eyááʼ”.

Xa̱bu̱ na̱nguá nidxawíín nimbáa xóo rí naʼthí Jesús. Xa̱bu̱ ede̱ bi̱ kuwa náa guʼwá ndxajkun túsngúún rúʼko̱. Náa numuu rí Jesús niʼsngáa májánʼ rá. Numuu rí xúgíʼ rí niʼsngáa ni̱ʼkha̱ náa Jeobá.