L’ɔkɔngɔ wa nde nsɔna apɔstɔlɔ 12, Yeso akaholɔ oma lo dikona oya lo dihole diakatshumana olui a woke w’anto. Vɔ wakaye oma la Ngalileya, Judeya, Tura, Sidɔna, Suriya ndo oma lo wedi okina wa Jɔrdana. Vɔ wakaye l’anto waki la hemɔ ndo amɔtshi wakahɛnyahɛnyamaka la ɛdiɛngɛ. Yeso akaakɔnɔla vɔ tshɛ. Oma laasɔ, nde akadjasɛ l’omamu wa dikona ndo akatatɛ ntɛkɛta. Nde akalembetshiya kɛnɛ kahombaso nsala naka talanga monga angɛnyi wa Nzambi. Sho pombaka mbeya dia tekɔ l’ohomba wa Jehowa ndo sho pombaka mbeka dia mbooka ngandji. Koko hatokoke mboka Nzambi ngandji naka hatoke anto akina ngandji. Sho pombaka monga ɔlɔlɔ ndo la losembwe otsha le onto tshɛ, oyadi kaanga otsha le atunyi aso.

Yeso akate ate: ‘Tokomɛke tsho lo nanga angɛnyi ayɛ. Wɛ pombaka nto nanga atunyi ayɛ ndo dimanyiyaka anto l’otema ɔtɔi. Naka onto ɔmɔtshi ambokomalɛ, tshɔka le nde aha la ntshimbatshimba dia tɔlɔmba edimanyielo. Salɛ anto akina akambo woho walangayɛ vɔ kosalɛ.’

 Yeso akasha nto alako w’amɛna wendana la lomombo la l’emunyi. Nde akate ate: ‘Ndeka dimɛna monga ɔngɛnyi wa Jehowa lo dihole dia monga la lokema la falanga. Wevi mbeyaka mbiva falanga yayɛ, koko ndooko lakoka mbiva lɔngɛnyi lele lam’asayɛ la Jehowa. Tanyoyakiyanyake dia kɛnɛ kayonyɔlɛ, kayonyɔnɔ kana kayonyɔlɔta. Nyende tofudu. Nzambi ndjashikikɛka mbala tshɛ dia tɔ tekɔ la diangɔ dia ndɛ. Ndjakiyanya hatokokimanyiya dia ntaloya lɔsɛnɔ layɛ kaanga lushi ɔtɔi. Nyohɔ dia Jehowa mbeyaka ehomba anyu.’

Elui w’anto watokaka ndooko lushi onto atɛkɛta woho wakatɛkɛtaka Yeso. Ewandji awɔ w’ɛtɛmwɛlɔ kombaetshaka akambo asɔ. Lande na kaki Yeso ombetsha a woke wa ngasɔ? Nɛ dia kɛnɛ tshɛ kakandetshaka ndja oma le Jehowa.