Yajni chʼak stsaʼ ja 12 sjekabʼanumik, ja Jesús koʼkon ja bʼa yaxkʼul sok waj bʼa jun lugar bʼa tsomane jitsan ixuk winik. Sok jakele bʼa Galilea, Judea, Tiro, Sidón, Siria sok ja bʼa pilan skʼaxil bʼa yok jaʼ Jordán. Yiʼajejan ja matik maloʼay sok ja matik wan ixtalajel yuja pukuji, jaxa Jesús ya tojbʼuk yibʼanale. Anto ti kulani ja bʼa sbʼalanil ja yaxkʼuli sok kʼe sjeyi ja ixuk winiki. Xcholo yabʼ ja jas tʼilan oj jkʼuluktik ta wa xkʼanatik kʼotel yamigo ja Dyos. Jel tʼilan oj ka jbʼajtik kwenta bʼa wa xmakunikujtik ja Jyoba sok snebʼjel syajtajel. Pe mini xbʼobʼ jyajtaytik ja Dyos ta mi xyajtaytik ja tuk ixuk winik. Jel tʼilan la jetik lekil jkʼujoltik sok toj ajyel yibʼanal soka ixuk winik, anima jkontratik.

Ja Jesús yala: «Mi malanukta syajtajel jawa wamigoʼik. Cha ojni yajtay jawa kontraʼiki sok yajel perdon ja tuk sok spetsanil wa kʼujol. Sok ta ay maʼ wa xkʼe xchʼinajil amok, kaʼax wego bʼa skʼanjelyi perdon. Ila ja tuk ja jastal waxa kʼana oj iljan ja weʼn».

 Ja Jesús cha yaʼa lekil rasonik sbʼaja jastik kiʼojtiki. Yala: «Jani mas tʼilan yamigoʼajel ja Jyoba yuj ajyelkujtik jitsan takʼin. Jun elkʼanum oj yelkʼa jawa takʼini, pe mini maʼ oj yelkʼawi ja yamigoʼajel ja Jyoba. Ja yuj, mok chamuka kʼujol yuja waʼelali, jas oja wuʼ ma jas oja lape. Kʼela ja yal chaniki. Ja Dyos tolabida wa stalna bʼa mi oj chamuke waʼin. Ajyel sok chamkʼujol, mini oj ya najatbʼuk jawa sakʼanili. Ajuluka kʼujol: ja Jyoba tolabida wa snaʼa ja jas wa xmakuniwuji».

Ja ixuk winik mini bʼa yabʼuneje pilan ja jastal wa xkʼumani ja Jesús. Mini bʼa jeʼubʼalyile yuja olomalik bʼa relijyon ja jastik jaw. ¿Jas yuj ja Jesús kʼot jun lekil jeʼuman? Yujni yibʼanal ja jas sjeʼa tini jakel bʼa Jyoba.