Bihain long Jisas i makim 12-pela aposel, em i lusim maunten na i go long hap we bikpela lain manmeri i bung. Ol i bilong Galili, Judia, Taia, Saidon, Siria, na long narapela sait bilong Jordan. Ol i bringim ol man i gat ol bikpela sik na sampela em ol dimon i mekim nogut long ol. Jisas i oraitim olgeta. Bihain em i sindaun long sait bilong maunten na stat long toktok. Em i stori long samting yumi mas mekim sapos yumi laik kamap pren bilong God. Yumi mas save olsem yumi nidim Jehova na yumi mas lain long laikim em. Tasol yumi no inap laikim God sapos yumi no laikim ol narapela man. Yumi mas mekim gutpela pasin na pasin fea long olgeta man, na tu, ol birua bilong yumi.

Jisas i tok: ‘Yupela i no ken laikim tasol ol pren bilong yupela, nogat. Yupela i mas laikim tu ol birua bilong yupela na fogivim ol long bel olgeta bilong yupela. Sapos wanpela i kros long yupela, go hariap long em na tok sori. Mekim pasin em yupela i laik ol narapela i mekim long yupela.’

 Jisas i givim tu ol gutpela edvais long ol manmeri long sait bilong mani kago. Em i tok: ‘Em i bikpela samting long stap pren bilong Jehova winim pasin bilong kisim planti mani. Raskol inap stilim mani bilong yupela, tasol i no gat wanpela inap stilim pasin pren bilong yupela wantaim Jehova. Stop long wari long wanem samting yupela bai kaikai, dring, o werim. Lukim ol pisin. God i save givim kaikai long ol na ol i no sot. Pasin bilong wari i no inap skruim wanpela de moa long laip bilong yupela. Tingim, Jehova i save long samting yupela i nidim.’

Dispela bikpela lain i no bin harim wanpela man i mekim kain tok olsem Jisas. Ol lida bilong ol long lotu i no bin skulim ol long ol dispela samting. Wai na Jisas i nambawan tisa? Bikos olgeta samting em i skulim ol long en i kam long Jehova.