Andzhako ka loku a hlawulile 12 wa vapostoli, Jesu i no chika a ta laha ku nga tlhangene vanhu vo tala. A vanhu lavo va wata hi Galileya, Judhiya, Tire, Sidhoni, Siriya ni le tlhelweni gin’wani ga Jordhani. Va wa tile ni vanhu va nga kari va babya ni vokari va nga xanisiwa hi madhimoni. Jesu i no hanyisa vontlhe zvonake a tshama laha tlhelweni ga citsunga a sangula ku wulawula. I no tlhamusela lezvi hi faneleko ku maha loku hi lava kuva vanghana va Nungungulu. I te hi fanele ku zwisisa lezvaku zva lisima a ku hi rangelwa hi Jehovha wutomini ga hina hi tlhela hi gondza ku mu randza. Kanilezvi, a zvi koteki a ku hi randza Nungungulu loku hi nga randzi van’wani. Hi fanele ku maha zva zvi nene ka vontlhe hi tlhela hi nga kanganyisi munhu — hambu lava va hi zondako.

Jesu i te: ‘A ku randza vanghana va wena basi a zvi eneli. U fanele ku randza ni lava va ku zondako u tlhela u tsetselela van’wani hi mbilu yontlhe. Loku a wokari a ku kwatela, tekela kuya u ya kombela rivalelo. Mahela van’wani lezvi u lavako ku va ku mahelawu’.

 Jesu i va nyikile wusungukati ga gi nene kambe xungetano hi titshomba. I te: ‘A ca lisima nguvhu kuva munghana wa Jehovha ku hundza kuva ni titshomba to tala. A mali yi nga yiviwa hi makhamba. Kanilezvi, a ku na munhu wa ku a nga ku yivela wunghana ga wena na Jehovha. Tsikani ku karateka muku kani mu taga yini, mu tanwa yini, kutani mu ta ambala yini. Cuwukani zvinyanyani. Contlhe cikhati Nungungulu wa ti nyika ca kuga. A ku karateka ne zvi nga ta engetela siku gin’we ga wutomi ga n’wina. Mu nga rivali a mhaka leyi: Jehovha wa zvi tiva lezvi zvi lavekako ka n’wina’.

A vanhu va wa nga se tshuka vazwa munhu na a wulawula ku fana na Jesu. A vaFarisi ni vaTsali — va nga hi vona varangeli va wukhongeli gabye — va wa nga va gondzisangi zvilo zvo fana ni lezvo. Hikuyini Jesu a nga hi mugondzisi wa mu nene nguvhu? Hi ku lezvi a nga zvi gondzisa zvi wata hi ka Jehovha.