Иисус 12 элчинни шилип алгаш, хөй чон чыылган дагга чедип келген. Олар Галилея, Иудея, Тир, Сидон, Сирия болгаш Иорданның өске талазындан келген. Улус аарыг база буктарга хинчектедип турар кижилерни эккеп турган. Иисус оларның шуптузун экиртип каан. Оон ол даг ийинге олуруп алгаш, улусту өөредип эгелээн. Канчап Бурганның өңнүү апарып болурун ол тайылбырлап берген. Ынчангаш Иегова чокта чурттап шыдавазывысты билип база аңаа ынак боор ужурлуг бис. Кижилерге ынак эвес болзувусса, Бурганга ынак бооп шыдавас бис. Ынчангаш улус бисти багай аажылаарга безин, буянныг, чөптүг хамаарылганы көргүзер ужурлуг бис.

Иисус: «Чүгле эштеринге ынак болуру чедишпес. Дайзыннарывыска база ынак болуп, улусту сеткиливистен өршээр ужурлуг бис. Бир кижи сенче хомудай берген болза, аңаа баргаш, бурууң минни. Өскелер сеңээ кандыг хамаарылгалыг болурун күзээр сен, оларга база ындыг хамаарылгалыг бол» — деп чугаалаан.

 Оон аңгыда, акшага шын хамаарылгалыг болурун база Иисус өөредип турган. Ол мынча дээн: «Иегова-биле найырал кандыг-даа акша-хөреңгиден чугула. Акшаңны оорлап болур, а Иегова-биле найыралыңны кым-даа оорлап шыдавас. Чүнү ижер, чиир азы кедер дээш сагышсырава. Куштарны көр даан. Бурган оларның чиир чеми үргүлчү турзун дээш сагыш човап турар. Сагышсыралдар чуртталганы бичии-даа узатпас. Сеңээ чүү херегин Иегова дыка эки билир деп утпа».

Кым-даа, кажан-даа Иисус ышкаш өөретпейн чораан. Шажын башкарыкчылары кижилерге ындыг чүүл кажанда-даа чугаалавайн турган. Иисус чүге ындыг эки башкы чораан? Чүге дизе ол Иеговадан өөренип алган чүүлүн улуска чугаалап турган.