Te kʼalal stsaojix-a te 12 ta tul jpuk-kʼopetike, te Jesús ko tal ta wits sok bajtʼ te banti stsoboj sbaik bayal ta tul ants winiketik. Talemik ta Galilea, Judea, Tiro, Sidón, Siria sok te machʼatik ayik ta jejch mukʼul jaʼ Jordán. La yikʼik tal te machʼatik ayik ta chamel o te ayik ta wokol yuʼun te chopol espirituetike, jich te Jesús la slekubteslan ta spisilik. Jich la snajkan sba ta jun wits sok jajch spʼijubtes te ants winiketike. La scholtiklanbey yaʼiy te bin ya skʼan ya jpastik teme ya jkʼan ya kamigointik te Diose. Ya skʼan ya xkʼot ta koʼtantik te ya jkʼantik koltayel yuʼun te Jehová sok te kʼuxuk ta koʼtantike. Pero ma xjuʼ kʼux ta koʼtantik Dios teme ma kʼuxuk ta koʼtantik te ants winiketike. Ya skʼan te lekuk koʼtantik sok te tojuk ya kiltik te yantike, jaʼnix jich ya skʼan ya jpastik ta stojol te jkontrataktike.

Te Jesús la yal: “Ma tikʼuk-a te kʼux ta awoʼtan te awamigotake, jaʼnix jich ya skʼan kʼux ta awoʼtan te akontratake sok te ya apasbey perdon sok spisil awoʼtan. Teme ay machʼa ya x-ilin ta atojole, baan kʼanbeya perdon ta oranax. Lekme ya awil te yantik jich bitʼil ya akʼan te lek ya awichʼ ilele”.

 Jaʼnix jich te Jesús la yakʼ bayal lekil tsitsel ta swenta te biluketik te ya xtuun kuʼuntike. La yal: “Jaʼ mukʼxan skʼoplal te ya kamigointik te Jehová ma jaʼuk te bayal jtakʼintike. Melel te j-elekʼe ya xjuʼ ya yelkʼan te takʼine, pero maʼyuk machʼa ya xjuʼ ya yelkʼanbat stukel te bitʼil awamigoinej aba sok te Jehovae. Jaʼ yuʼun, mame xa amel awoʼtan yuʼun te weʼelil, te bin ya awuchʼ sok te akʼuʼ apakʼe. Ilawil te jaʼmal mutetike. Te Dios spisil-ora ya skanantay sok ya yakʼbey bayal sweʼel. Manchukme ya amel awoʼtan, ma xnajtʼub akuxlejal yuʼun. Naʼame, te Jehová ya snaʼ spisil te bin ya xtuun awuʼune”.

Te ants winiketik maʼyuk banti jich yaʼiyojik-a te bitʼil kʼopoj te Jesuse. Te jwolwanejetik yuʼun relijion maʼyuk yakʼojik te nojptesel-abi. ¿Bin yuʼun lekil jpʼijubteswanej kʼot te Jesuse? Melel spisil te bin la yakʼ ta nopele talem ta stojol te Jehová.