Katapos ni Jesus magpili han 12 nga apostol, linusad hiya ha bukid ngan kumadto ha dapit nga may nagtitirirok nga damu nga tawo. Tikang hira ha Galilea, Judea, Tiro, Sidon, Sirya, ngan ha tabok han Jordan. Nagdara hira hin mga may sakit ngan pipira nga ginpapasakitan hin mga demonyo. Hira ngatanan gintambal ni Jesus. Tapos, liningkod hiya ha bakilid han bukid ngan nagtikang magtutdo. Iya iginsaysay kon ano an kinahanglan naton buhaton kon karuyag naton magin sangkay han Dios. Sadang naton karawaton nga kinahanglan naton hi Jehova ngan higugmaon naton hiya. Pero diri naton mahihigugma an Dios kon diri naton hihigugmaon an iba. Kinahanglan magin buotan ngan maopay kita ha ngatanan, bisan ha aton kaaway.

Hi Jesus nagsiring: ‘Diri igo nga an imo la mga sangkay an imo hihigugmaon. Kinahanglan higugmaon mo liwat an imo mga kaaway ngan kinasingkasing nga pasayloon an imo igkasi-tawo. Kon may nasisina ha imo, kadtoa dayon hiya ngan pangaro hin pasaylo. Tratara an iba ha paagi nga karuyag mo trataron ka nira.’

 Naghatag liwat hi Jesus hin maopay nga sagdon mahitungod ha materyal nga mga butang. Hiya nagsiring: ‘Mas importante an pagin sangkay ni Jehova kay ha pagkaada damu nga kwarta. Puydi kawaton an kwarta, pero waray makakakawat han imo pakigsangkay kan Jehova. Ayaw na kabaraka han imo kakaunon, iinumon, o igsusul-ot. Kitaa an mga tamsi. Ginsisiguro pirme han Dios nga may igo hira nga makakaon. An pagkinabaraka diri makakadugang hin usa ka adlaw ha imo kinabuhi. Hinumdumi, maaram hi Jehova han imo ginkikinahanglan.’

Waray pa gud nabatian an mga tawo nga nagyakan pariho kan Jesus. An sugad nga mga butang waray itutdo han ira mga lider han relihiyon. Kay ano nga hi Jesus maopay gud nga magturutdo? Kay ngatanan nga iya igintututdo tikang kan Jehova.