Baka nifidy apostoly 12 Jesosy tamy zen̈y. Nijotso baka tamy bongo izy, baka io nan̈aton̈o vahoaka. Nisy tamindro olo aby io baka Galilia, Jodia, Tyro, Sidona, Syria, ndreky baka tandaforeny Jordana. Nitondra olo narary ndreky nampijaliny demony iro. Nitahany Jesosy olo jiaby zen̈y. Nipetraka tan̈abony bongo io Jesosy, ke nan̈ano toriteny. Izy nan̈azava raha tsy maintsy hataontsika izikoa atsika tiho kamaradiny Zan̈ahary. Atsika mila mahatsiaro fa mila Jehovah ndreky mifen̈y ho tia izy. Tsy mety ho tia izy atsika, izikoa tsy tia olo. Mila tsara fan̈ahy aminolo jiaby atsika, ndray olo io tsy mankatia atsika.

Ho Jesosy: ‘Tsy mety izikoa kamaradinao fo tianao. Tiava koa fahavalonao, baka io tokony han̈ambela helokonolo baka amy fô koa anao. Koa misy olo meloko aminao, mandihana malaky mifono aminany. Ataova aminolo zay raha tianao hataony aminao.’

 Jesosy koa nikoran̈a raha momba vola ndreky fanan̈ana. Izy nivolan̈a: ‘Sitrany minaman̈a amy Jehovah, toizay manandraha maro. Pangalatra mety hangalatra volanao, fa tsisy olo mahavita misakana anao hinaman̈a amy Jehovah. Aza miasa loha mare aminy hanin̈y, raha higiahin̈y, na hisikinin̈y, fa nata voron̈o aby io amiany Zan̈ahary hanin̈y mahampy iro. Anaro ndray miasa loha tsy hanjary ho ela velon̈o. Aleva onon̈o fa hainy Jehovah raha ilainaro.’

Sambany naharen̈y olo nampianatra karaha nataony Jesosy io vahoaka aby io. Pitariky fivavahan̈a aby io tsiary nampianatra raha zen̈y. Ino nahavy Jesosy nahay nampianatra? Fotony baka tamy Jehovah raha jiaby nampianariny.