Ka tsʼoʼok u yéeyik Jesús u 12 apostoloʼobeʼ, éem teʼ puʼukoʼ ka bin tuʼux u muchʼmuba yaʼab máakoʼob. Letiʼobeʼ taaloʼob desde Galilea, Judea, Tiro, Sidón, Siria yéetel tiʼ tuláakʼ juntséel le río Jordanoʼ. Tu taasoʼob máakoʼob kʼojaʼanoʼob wa táan u beetaʼal u muʼyajoʼob tumen le demonioʼoboʼ. Jesuseʼ tu láaj tsʼakoʼob. Ka tsʼoʼokeʼ kulaj tu jáal le puʼukoʼ ka joʼopʼ u kaʼansik le máakoʼoboʼ. Tu tsolaj baʼax unaj k-beetik wa k-kʼáat k-bisba yéetel Dios. Utiaʼal lelaʼ unaj k-tsʼáaik cuenta kʼaʼabéettoʼon u yáantaj Jéeoba yéetel kʼaʼabéet k-yaabiltik. Chéen baʼaleʼ maʼ tu páajtal k-yaabiltik Dios wa maʼ k-yaabiltmaj uláakʼ máakoʼobiʼ. Kʼaʼabéet k-eʼesik utsil yéetel k-tratartik maʼalob u maasil, tak le máaxoʼob pʼekmiloʼonoʼ.

Jesuseʼ tu yaʼalaj: ‹Maʼ chéen unaj a yaabiltik a amigoʼobiʼ, kʼaʼabéet xan a yaabiltik a enemigoʼob yéetel a perdonartikoʼob yéetel tuláakal a puksiʼikʼal. Tsʼoʼoleʼ wa yaan máax ku pʼuʼujul ta wéeteleʼ, xeen tu séebaʼanil a kʼáat ka u perdonartech. Tratart u maasil jeʼel bix a kʼáat ka tratartaʼakecheʼ›.

 Jesuseʼ tu yaʼalaj xan bix unaj u yilaʼal u yantal yaʼab baʼaloʼob tiʼ máak. Tu yaʼalaj: ‹Maas kʼaʼanaʼan u biskuba máak yéetel Jéeoba ke u yantal yaʼab taakʼin tiʼ. Tumen le taakʼinoʼ jeʼel u yoklaʼal tech tumen wa máaxeʼ, chéen baʼaleʼ a biskaba yéetel Jéeobaeʼ mix máak jeʼel u luʼsiktecheʼ. Le oʼolaleʼ xuʼuluk a chiʼichnaktal yoʼolal le janaloʼ, le ukʼuloʼ wa le nookʼoʼ. Tuukulnen tiʼ le mejen chʼíichʼoʼoboʼ. Dioseʼ mantatsʼ ku kanáantkoʼob yéetel ku tsʼáaik baʼal u jaantoʼob. Kex ka sen chiʼichnakchajkecheʼ maʼ tun maas chowaktal a kuxtal. Kʼaʼajaktecheʼ Jéeobaeʼ u yojel mantatsʼ baʼax kʼaʼabéettech›.

Le máakoʼoboʼ jach jatsʼuts tu yuʼubiloʼob bix u kaʼansaj Jesús. Le fariseoʼob yéetel le escribaʼoboʼ maʼ u kaʼansmaj kaʼach tiʼob le baʼaloʼobaʼ. ¿Baʼaxten jach maʼalob bix úuchik u kaʼansaj Jesús? Tumen tuláakal le baʼax tu kaʼansoʼ tiʼ Jéeoba u taal.