Jami ducu ma Luparicayo onongo gitimo obedo pi nongo pak ki bot dano. Ka gutimo gin mo me kica, nongo gutimo wek jo mukene gunengi. Onongo gilego i dye lwak wek dano weng gunengi. Luparicayo onongo gimako lega maboco ki wigi ci gicito ka wacone i kacokke nyo i dye gudo ka ma dano ducu twero winyone. Pi man, dano gubedo ki ur i kare ma Yecu owaco botgi ni: ‘Pe wuleg calo Luparicayo. Gin gitamo ni Lubanga bibedo ki ur pi lwagi lok ma giduro-ni, ento kulu. Lega tye i kin dano moni ki Jehovah. Pe wubed mere ka nwoyo en lok acel moni-ni. Jehovah mito ni itit bote kit ma iwinyo kwede ki i cwinyi.

‘Dong wuleg kit man ni: “Wonwa ma tye i polo, giwor nyingi maleng. Ker meri obin; giti gin ma imito i lobo  kit ma gitiyo i polo.”’ Yecu bene otito botgi ni myero guleg pi camgi me nino meno, wek kitimigi kica pi balgi, ki dong jami mukene ma gudo kwogi.

Yecu owaco ni: ‘Pe wujuk lega. Wumedde ki penyo Wonwu, Jehovah, pi jami mabeco ma wumito. Lunyodo ducu gimito miyo jami mabeco bot lutinogi. Ka latinni olegi ni imiye kwon, ci ibimiye gweng? Ka olegi ni imiye rec, ci ibimiye twol?’

Ka dong Yecu otito ni: ‘Ka wungeyo miyo mot mabeco bot lutinowu, ci Wonwu Jehovah pe bikatowu kun miyo botwu cwiny maleng? Gin ma myero wutim aye me medde ki penye.’ Tika ilubo tam ma Yecu omiyo-ni? Jami macalo mene ma in ilego pire?