Jufarisayo gibed gitimo lembe ceke pi nitelo nen mi dhanu. Ka gitimo lembe moko ma ber, gitime kara dhanu unen. Gibed girwo kaka ma dhanu bepong’ lee i ie kara junengi. Jufarisayo gibed gimaku rwo ma boco man gibed gitere ku wigi i sinagog kud i akara yo kaka ma dhanu copo winjogi i ie. Pieno, i dhanu uwang’ lii kinde ma Yesu uyero igi kumae: ‘Kud wurwo calu Jufarisayo. Gibed giparu nia gibinyayu anyong’a i Mungu pi wec migi ma dupa ma gibeyero, ento etie kumeno ngo. Rwo utie i kindwu wuku Yehova. Kud ibed iyer lembe ma rom wang’ dupa dupa. Yehova ubemito ikor ire tap ayi m’ibewinjiri ko i adundeni.’

‘Wubed wurwo kumae: Wegwa ma ni i polo, Nyingi bed leng’. Ker peri bin, Yeny m’inyenyo utimbre i ng’om calu etimbre i polo.’  Yesu uyero igi bende nia gibed girwo pi cam ma kubang’ ceng’, gibed girwo kara dubo migi uwekere, man gibed girwo pi peko ma ng’atuman ubenwang’ere ko.

Yesu uyero bende kumae: ‘Kud wuwek nirwo. Wumeduru nikwayu lembe ma beco i bang’ Wegwu ma Yehova. Wego ceke bemito emii piny ma beco ni nyathin pare. Tek wodi ukwayu mukathi i beng’i, nyo ibimio ire kidi? Kunoke tek ekweyi ku rec, nyo ibimio ire thwoli?’

I ng’eye, Yesu ukoro i ponjine kumae: ‘Ka wun de wung’eyo nimio giramia ma beco ni awiya mwu, dong’ Wegwu ma Yehova, bimio ngo iwu tipo maleng’ nisagu? Gin m’ukwayu wutim, utie nipenjo.’ Nyo ibed ilubo juk maeno ma Yesu umio? Ibed irwo iwi lembang’o?