Fariseonakajj jaqenakar musparayañatakikiw kunsa lurapjjäna. Kunsa sum lurapjjäna ukhajja, jaqenakampi uñtayasiñatakikiw lurapjjäna. Amuytʼañataki, taqenin uñjkañäki uka lugaranakanwa Diosarus orasipjjäna. Wali jachʼa oracionanakwa pʼeqer yatsupjjerïna, uksti istʼayasiñ laykojj sinagoganakana, callenakanwa jachʼat repetipjjerïna. Ukatwa Jesusan arup istʼasajj jaqenakajj musparapjjpachäna, jupajj akham sänwa: ‘Jan fariseonakjam orasipjjamti. Jupanakajj walja arunak arsusas Diosampi istʼayasipkaspa ukham amuyapjje. Janiw taqenin uñjayasiñatakejj orasipjjañamäkiti, antisas jumampi Jehová Diosampikiw parltʼasipjjañama. Janirak pachpa arunakaki repetipjjamti. Diosajj chuymamat parlañamwa muni’ sasa.

Jesusajj kunjamsa orasiñasa ukjja akham sasaw yatichäna: “Alajjpachankir nanakan Awkija, sutimajj jachʼañchatäpan. Reinomajj jutpan.  Munañamajj luratäpan, kunjamatï alajjpachan luraski ukhamarak aka oraqens luraspan” sasa. Ukatjja Jesusajj manqʼa sapür mayisiñataki, juchanakat perdón mayisiñataki, yaqha ukhamanak toqet orasiñatakiw yaticharakïna.

Jesusajj akham saskakïnwa: ‘Sapa kuti Diosar orasipjjam. Jehová Dios Awkimarojj kunatï sumäki ukanak mayisipkakim. Taqe awkinakaw kunatï sumäki ukanak wawanakaparojj churañ yatipjje. Wawamatï tʼantʼa mayiristam ukhajj ¿qala churasmati? Chawlla mayiristam ukhajj ¿mä asiru churasmati?’ sasa.

Uka arunakampejj kamsañsa munäna ukwa Jesusajj akham sasin qhanañchäna: ‘Jumatï wawamar suma regalonak churañ yatstajja, ¿janit Jehová Diosajj espíritu santo churkätamjja? Diosajj churätamwa, mayiskakiñamawa’ sasa. ¿Jumajj kuntï Jesusajj siskäna ukti lurtajja? ¿Jehová Diosar orasta ukhajj kunsa mayta?