Lôk Farisai i bé gwés i nene i mis ma bôt. Ngéda Farisai i bé boñ jam lilam, hala a bé inyu boñ le bôt ba yimbe bo. Ba bé ba nsoohe i mbamba, inyu boñ le hiki mut a tehe bo. Farisai i bé nigil mimbôñgô mi masoohe, ba tiimbaga mo ikété mandap map ma mitin, ni i miñem mi minloñ i het bôt ba bé le ba emble bo. Jon bôt ba bi hel ngéda Yésu a kal bo le: ‘Ni soohe bañ kiki Farisai. Inyule ba nhoñol le ba ga nene loñge bisu bi Djob ibale ba mpot ngandak, ndi to jam. Masoohe ma mbéñge ndik bébomede ni Yéhôva. Ni tiimba bañ minlélém mi bibañga, tiimba ni tiimba. Yéhôva a ngwés le ni kal nye mam ma yé bé ikété ñem.

 ‘Hana nyen ni nlama soohe: “A Tata wés nu a yé ngii, jôl joñ li tééba lipubi. Ane yoñ i lo. Sômbôl yoñ i bôña isi kiki ngi.”’ Yésu a bi kal ki bo le ba nlama soohe inyu koga yap i kel, inyu nwéhél i bibéba gwap, yak inyu mam ma mbéñge bo.

Yésu a kal le: ‘Ni waa bañ masoohe. Kena ni bisu i bat Tata nan, Yéhôva, mam malam. Hiki ngwal a ngwés ti man wé gwom bilam. Ibale man woñ a mbat we koga, baa u ga ti nye ngok? Tole ibale a mbat we hiobi, baa u ga ti nye nyoo?’

I mbus, Yésu a toñle bo jam ba nlama tééda: ‘Ibale ni nyi ti bon banan makébla malam, bôô ni ngélé yañen ni Isoñ nan le Yéhôva, nu a nla ti bé mbuu mpubi? Yom yosôna ni nlama boñ i yé ndik le ni bat.’ Baa yak we u noñ maéba ma Yésu? Inyu mimbe mintén mi mam u nsoohe?