Snonkaku Farisi simarisen sifrur fa snonkaku sya smanen si. Sifrur pyum insama snonkaku sya smam si. Simarisen senadi ro moḇ snonkaku sya simbran mura muma rona insama kawasa smam si. Snonkaku Farisi siswarepen nadi ḇekwan na ma sapkaḇer nadi ani ro rum ari ma nyan farsam insama snonkaku sya srower si. Inja, snonkaku sya skandor kaku fafisu Yesus ikofen, ’Mkoḇenadi awer raris snonkaku Farisi sya. Skara Allah imarisen faro rosai sikofen na, ḇape oroḇa. Mkoḇenadi insama snonkaku sya smam mko ḇa, mboi samaido mkawos kuker Yahwe I monda. Mkap kaḇkaḇer awer wos mkoḇena. Yahwe imarisen mkokofen rosai ḇero sne mkoḇena.

’Mkoḇenadi radine, ”Kma nkobedi ro boiyaswa, Nkofasren Snomḇri kada, [Karajan] Bedi ryama kada,  Marisen bedi ryarirya kada ro supswan ine imnis ro boiyaswa.”’ Yesus ikofen kako bisa senadi fa sor roḇean faro ras ani, sor maf ro sasar sena, ma senadi faro roi ḇesena kako.

Yesus ikofen, ’Mkoḇenadi pdef. Mkor pdef roi ḇepyum faro Kma mkoḇedi, Yahwe I. Sinan sya na sḇuk roi ḇepyum faro romawa sesya. Romawa mkoḇesya sor mamami ido, na mkoḇuk karui oso ḇe i ke? Dor in ido, na mkoḇuk ikak ḇe i ke?’

Ramnai Yesus ikofenḇair wer ḇe si, ’Mko monda mkofawi mkoḇuk roi ḇepyum ḇe romawa mkoḇesya, syadi wer Kma mkoḇedi, Yahwe I. Nari ḇyuk rur ḇesren ḇe mko. Fandun fa mkor ḇe I monda.’ Waso Yesus wos ḇyena ke? Rosai monda wor ro nadi Bena?