Te Ivbi e Farisi wa gha ru emwi nọ gha ya emwa gha tian iran. Iran gha ru ẹse ne ọmwa, iran ghi gha hoo ne emwa hia bẹghe ẹre. Iran gha khian na erhunmwu, iran ghi gha rrie idagbo, ne aro emwa hia mieke na sẹ ọre. Ivbi e Farisi gha ghi ruẹ erhunmwu nọ taan nẹ, iran ghi muẹn ye uhunmwu. Iran gha ghi sẹ e sinagọg kevbe abọ idunmwu, iran ghi suẹn gha na erhunmwu sirra emwa hia. Ọna ẹre ọ si ẹre nọ na kpa emwa nibun odin vbe Jesu ghi tama iran wẹẹ: ‘Wa ghẹ gha na erhunmwu vbe na ghee Ivbi e Farisi. Te iran roro wẹẹ, iran gha na erhunmwu nọ taẹn, ẹre Osanobua khian na họn erhunmwu iran. Sokpan ọni i re ẹmwata. Ọ khẹke ne erhunmwu ne uwa na, gha rre uwu ẹkpo uwa vbe Jehova. Wa ghẹ gha ta ẹmwẹ ọkpa yangbe yangbe. E Jehova hoo ne uwa fannọ otọ ẹko uwa ma irẹn vbe erhunmwu.

 ‘Adeghẹ uwa khian na erhunmwu, uwa ghi wẹẹ: “Erha mwa ne ọ rre ẹrinmwi, gia ya ọghọ ne eni ruẹ nọhuanrẹn, gi Arriọba ruẹ rre, gia gha ru iho ruẹ vbe agbọn vbe ne iran ru vbe ẹrinmwi.”’ Jesu na vbe tama iran, ne iran gha nọ Osanobua ne ọ kpemehe evbare ẹdẹ ne iran, kevbe ne ọ ya orukhọ ọghe iran bọ iran. Ọ vbe tama iran, ne iran gha ta enegbe iran ma Osanobua.

Jesu keghi tama iran wẹẹ: ‘Wa ghẹ dobọ erhunmwu ne a na yi. Wa ye gha nọ emwi vbe obọ Erha mwa ighẹ e Jehova. Ai miẹn evbibiẹ ọmọ ọkpa, ne ẹi gualọ emwi nọ maan ne ovbiẹre. Adeghẹ ovbuẹ na nọ ruẹ eka, u gha mu okuta ye ọre obọ ra? Ọ na nọ ruẹ ehẹn, u gha mu ẹyẹn nẹ ra?’

Vbe iyeke ọni, Jesu keghi rhan otọ emwi ne ọ ya ẹmwẹ na kha. Ọ na wẹẹ: ‘Adeghẹ uwa sẹtin gha ru ẹse ne ivbi uwa, inu ghi nọ ne Erha mwa ighẹ e Jehova? Wa ma yayi wẹẹ, ọ gha vbe rhie orhiọn nọhuanrẹn ọghẹe ne uwa, deghẹ uwa na nọ rẹn ra?’ Uwẹ lele ibude ọghe Jesu ra? De emwi eso ne uwẹ nọ Osanobua re vbe erhunmwu?