Kalak Parisi merhat kel iperdiateken kalak. Lakokenna pe si mehuli gelah idah kalak saja nge. Kalak enda pe ertoto bas ingan si enterem jelma gelah idah kalak. Totona pe nggo ihapal, nce gedang ka, janah e lalap si iulang-ulangina. Kalak e ertoto i rumah pertoton ras i simpang-simpang dalan gelah ibegi kalak. Emaka sengget kel kalak sanga ikataken Jesus, ‘Ula kam ertoto bagi kalak Parisi. Akapna meriah ukur Dibata megiken totona si gedang e, tapi situhuna labo ialoken Dibata. Toto e urusenndu ras Dibata ngenca. Ula iulang-ulangindu totondu. Isi pusuhndu nge si penting man Jahwe.

‘Bagenda me cara ertoto si benar, “Bapak kami si i surga, ipebadia min gelarNdu. Reh min KinirajanNdu. Sehlah min peratenNdu, i doni bagi i surga.”’ Ikataken Jesus ka maka kalak e pe perlu ertoto mindo pangan, mindo gelah iampuni, ras notoken kalak si deban.

Nina Jesus ka, ‘Teruslah ertoto. Teruslah pindo kai si mehuli man Bapakndu, Jahwe. Kerina orang tua pasti mereken si mehuli man anakna. Adi pindo anakndu roti, mungkin nge berendu batu? Adi ipindona nurung, mungkin nge iberendu nipe?’

Kenca si e, ijelasken Jesus kai ertina e, nina, ‘Adi kam saja pe berendu si mehuli man anakndu, apai ka Bapakndu Jahwe. Pasti ibereNa kam kesahNa si badia, adi ipindondu.’ Nggo nge ilakokenndu kata Jesus e? Kai saja si itotokendu?