Tiʼ pejtelel tsaʼ bʌ i mele (chaʼle) jiñi fariseojob chaʼan jach yom miʼ qʼuejlelob ti ñuc. Mi an chuqui utsʼat miʼ melob, chaʼan jach yom miʼ qʼuejlelob. Jumpʼejl ejemplo, miʼ chaʼleñob oración yaʼ baqui an cabʌlob chaʼan miʼ qʼuejlelob. Tsiʼ wen ñopoyob jal tac bʌ oración, i tsiʼ chaʼ alʌyob yaʼ ti sinagoga tac yicʼot ti calle tac chaʼan miʼ yubintelob. Jin chaʼan toj sajtelob i pusicʼal jiñi lac piʼʌlob cheʼ bʌ Jesús tsiʼ yʌlʌ: «Mach a chaʼlen oración cheʼ bajcheʼ jiñi fariseojob. Miʼ ñaʼtañob chaʼan miʼ yʌcʼob ti toj sajtel i pusicʼal Dios cheʼ miʼ cʌlʌx chaʼleñob tʼan, pero mach isujmic. Jiñi oración a chaʼan jach a wicʼot Jehová. Mach a chʌn al jiñi a wujilix bʌ. Jehová yom maʼ suben am bʌ ti a pusicʼal».

Jesús tsaʼ caji i bej tsictesan bajcheʼ yom miʼ mejlel jiñi oración: «C tat lojon añet bʌ ti panchan, laʼ sʌqʼuesʌntic a cʼabaʼ. Laʼ tilic a Yumʌntel. Laʼ mejli chuqui a wom, cheʼ bajcheʼ yaʼ ti  panchan yicʼot wʌʼ ti pañimil». Jesús tiʼ subeyob jaʼel chaʼan yom miʼ melob oración chaʼan i bʌl i ñʌcʼob ti jujumpʼejl qʼuin, chaʼan miʼ ñusʌbentelob i mul yicʼot chaʼan yan tac bʌ.

Jesús tsiʼ yʌlʌ jaʼel: «Mach a cʌy a chaʼlen oración. Chʌn cʼajtiben a Tat Jehová chuqui wen tac bʌ. Jiñi tatʌlob miʼ mulan i yʌqʼueñob chuqui wen tac i yalobilob. Mi a walobil tsiʼ cʼajtibeyet caxlan waj, ¿muʼ ba caj a wʌqʼuen xajlel? Mi tsiʼ cʼajtibeyet chʌy, ¿muʼ ba caj a wʌqʼuen lucum?».

Cheʼ jiñi, Jesús tsiʼ yʌlʌ chuqui miʼ cʌntesañonla jiñi tsaʼ bʌ i yʌlʌ: «Mi a wujil i yʌqʼuentel wen bʌ i majtan a walobil, ¡bajcheʼ maʼañic mi caj i yʌqʼueñet chʼujul bʌ espíritu jiñi a Tat Jehová! Cojach yom maʼ cʼajtin». ¿Muʼ ba a mel tsaʼ bʌ i yʌlʌ Jesús? ¿Chuqui maʼ cʼajtiben Jehová cheʼ maʼ chaʼlen oración?