A kakaraoi bwaai ni kabane Baritaio ibukin anaakin nanoia aomata. Ngkana a karaoa te bwai teuana ma te akoi, a bon tii kan noraki irouia aomata. A tatataro naba n ana tabo te botannaomata bwa a aonga n noraki irouia aomata. A kamatenanoi tataro aika abwabwaki ao a kaokiokii taekaia ngkana a tataro n taian tinakoka ke i tutani kawai, bwa a na ongo aomata. Ngaia are a mimi aomata ngke e tuangia Iesu ni kangai: ‘Tai tataro n aroia Baritaio. A iangoia bwa e na kukurei te Atua ngkana a bati aia taeka ma e bon aki. Te tataro bon tii i marenam ma Iehova. Tai taekini taeka aika titeboo ni kaokiokii. E tangiria Iehova bwa ko na tuangnga am namakin.

‘Aio aromi n tataro: “Tamara are i karawa, e bia katabuaki aram. E bia roko am Tautaeka n Uea. E na kakororaoaki nanom i karawa ao n  te aonnaba naba.”’ E tuangia naba Iesu bwa a riai n tataro ibukini kanaia n te bong anne, kabwaraan aia bure, ao bwaai riki tabeua aika a kainnanoi.

E taku Iesu: ‘Tataro n taai nako. Teimatoa ni butiia Tamami ae Iehova baika raraoi. A kan angania natiia baika raraoi kaaro. Ngkana e butiiko natim te kariki, ko na anganna te atibu? Ngkana e butiiko te ika, ko na anganna te naeta?’

Imwin anne, e a kabwarabwaraa Iesu te reirei mai iai: ‘Ngkai kam ataa aromi n angania natimi bwaintangira aika raraoi, ai batira riki nanon Tamami ae Iehova ni kan anganingkami te taamnei ae raoiroi? Te bwai ae ko riai ni karaoia bon tii te bubutii.’ Ko ota n ana taeka n reirei Iesu aei? Ao ngkoe, baikara bwaai aika ko tatataroi?