Aainjashii neʼe kasa anasü na fariseokana süpüla neʼnnüin sutuma wayuu. Jamüshiijaʼa noʼuraajüle, naaʼinrüin shia suʼupala watta saalii wayuu. Neitirakuʼu namüsü tü nanüikikat sünain oʼuraajaa suluʼu tü ekirajüleekalüirua jee suluʼu tü wopukot süpüla saapünüin nanüiki sutuma wayuu. Süka müin nakuwaʼipa na fariseokana, ponusü saaʼin tü wayuukalüirua müin nünüiki Jesuu: «Wanaa sümaa juchuntuin nümüin Maleiwa, nnojo müin aka jia nakuwaʼipa na fariseokana. Anasü maʼin tü nakuwaʼipakat nuʼupala Maleiwa naaʼinruʼu süka anain maʼin nanüiki. Nnojotpajaʼa anain tü naaʼinrakat noʼuluʼu Maleiwa. Wanaa sümaa juchuntuin nümüin Jeʼwaa, nia neʼe niakai chi juchuntajachikai amüin, nnojo jiitirakuʼu müin jünüiki. Jüküja nümüin Jeʼwaa tü suluʼukat jaaʼin».

Nüküjaleein Jesuu namüin na wayuukana jamüinjatüin nanüiki noʼuraajapa. «Taata Maleiwa chakai sirumatuʼu, wule putuma tü pünüliakat. Püntira tü  Puluwataayakat. Saainjüna tü keeʼireekat paaʼin yaa mmapaʼa maʼaka saainjünüin chaa iipünaa», nümaka. Nüküjain Jesuu nachuntajanain nümüin Maleiwa süpüla naapüin tü neküinjatkat otta süpüla motuinjatüin naaʼin naainjala otta nachuntajanain süpüleerua waneirua kasa.

Anuu sooʼomüin nünüiki Jesuu: «Anakajaʼa müleka juchuntule kasa anasü nümüin chi Jüshikai Jeʼwaa waneepia. ¿Jamüsü jukuwaʼipa jiakana namüin jüchonnii? Maʼaka nuchuntule pümüin wanee pan chi püchonkai, ¿paapeerü wanee ipa nümüin? Nnojottaa. Jama nuchuntule wanee jime, ¿paapeerü wanee wüi nümüin? Nnojottaa».

Nüküjaka Jesuu atüjeenain waya sünainjee tü nünüikikat: «Eerejeʼe neʼe wayuuin kaainjaralii jia, atüjashii jia asülajaa kasa anasü namüin na jüchoinkana. Nialeeka chi Jüshikai Maleiwakai chakai iipünaa, alanaʼaleeshia maʼin sünain anamiain jümüin. Naapeechi chi Naaʼinkai jümüin müleka juchuntüle nümüin», nümaka. ¿Paaʼinrüinche tü nümakat Jesuu? ¿Kasa puchuntaka nümüin Jeʼwaa puʼuraajapa?