Nitre fariseo nämene dre dre nuainne ye nämene nuainne jerekäbe ja bä mikakäre nitre mada okwäbiti. Niaratre nämene dre kwin nuainne, ye ngwane nämenentre nuainne nitre mada töi mikakäre niä. Ñodre, niaratre nämene orare ye ngwane nämenentre nuainne ni jökrä ngwärekri ne kwe jutuadre nitre ie. Nämenentre orasion nga ye mike gare töbiti jai aune biti niaratre nämene niereta sinagogate aune ji ngrabare bati bobu ne kwe nitre ie kukwei juruadre. Ye medenbätä, Jesukwe kukwe niebare ne käkwe nitre mikani töi ñan krütare: ‘Mäkwe ñaka oradre nitre fariseo kwrere. Niaratre tä nemen nütüre tätre orasion nuainne yebiti Ngöbö mikai ñan töi krütare kwetre, akwa ye ñaka metre. Mätä orare ye ngwane mätä blite Jehová aibe ben. Mäkwe ñaka kukwe arabe nie käre. Ja ruin ño mäi ye erere mäkwe mika gare bökän Jehovai ie tö’.

 Oradre ño ye Jesukwe mikani gare jankunu: ‘Nun Rün kä kwinbiti mä kä rabadre mikani deme. Gobran mäkwe jatadre. Mä töita dre nuainbätä kä kwinbätä ye erere rabadre bare kä tibienbätä’. Ye bitikäre Jesukwe niebare nitre ie, niaratre rabadre orare mrö köbö kwatire kwatire ye kräke aune ngite juandre ta bititre aune jondron mada mada yebätä.

Ne madakäre, Jesukwe niebare: ‘Käre munkwe oradre. Munkwe jondron kwin kärä jankunu mun Rün Jehová ie. Nitre rüne jökrä töta nemen jondron kwin biain monsotre kwe yei. Monso mäkwe ban kärädre mäi, ¿mäkwe jä biandre ie? O gwa kärädre kwe mäi, ¿mäkwe kulebra biandre ie?’.

Jesukwe kukwe mikani gare yebätä ni rabadre ja kite niebare kwe: ‘Mä tärä jondron kwin bien monso mäkwe ie, ¡mä Rün Jehová bärira jire, niara raba üai deme bien mäi! Akwa mä rabadre ribere ie’. ¿Jesukwe kukwe niebare ye erere mätä nuainne? ¿Mätä orare Jehovai ye ngwane mätä dre kärere ie?