Ang tanan nga ginahimo sang mga Fariseo pagpadayawdayaw lang sa mga tawo. Pakitakita lang ang ila paghimo sing maayo. Nagapangamuyo sila sa atubangan sang madamo nga tawo para makita sila sang tanan. Saulado sang mga Fariseo ang malawig nga mga pangamuyo kag ginasulitsulit nila ini sa mga sinagoga kag sa mga dalan para mabatian ini sang iban. Gani nakibot ang mga tawo sang nagsiling si Jesus: ‘Indi kamo mangamuyo pareho sang pagpangamuyo sang mga Fariseo. Abi nila kon nanamian ang Dios sa ila madamo nga ginahambal, pero wala. Ang pangamuyo amo ang inyo pagpakighambal kay Jehova. Indi pagsulitsulita ang inyo ginahambal. Gusto ni Jehova nga ihambal ninyo sa iya kon ano gid ang inyo ginabatyag.

‘Dapat mangamuyo kamo sing pareho sini: “Amay namon nga yara sa langit, pakabalaanon ang imo ngalan. Magkari ang  imo Ginharian. Matuman ang imo kabubut-on sa duta subong sang sa langit.”’ Nagsiling man si Jesus nga dapat nila ipangamuyo ang ila pagkaon para sa tagsa ka adlaw, nga patawaron sila sa ila mga sala, kag ang parte sa iban pa nga personal nga butang.

Si Jesus nagsiling: ‘Indi gid kamo mag-untat sa pagpangamuyo. Padayon kamo nga mangayo sa inyo Amay, nga si Jehova, sing maayo nga mga butang. Gusto hatagan sang kada ginikanan ang ila bata sing maayo nga mga butang. Kon mangayo ang inyo bata sing tinapay, hatagan bala ninyo sia sing bato? Kon mangayo sia sing isda, hatagan bala ninyo sia sing man-ug?’

Dayon ginpaathag ni Jesus ang leksion sa sini: ‘Kon makahibalo kamo maghatag sing maayo nga mga regalo sa inyo mga bata, indi bala nga ihatag gid sa inyo sang inyo Amay nga si Jehova ang iya balaan nga espiritu? Kinahanglan lang ninyo ini pangayuon sa iya.’ Ginasunod mo bala ang laygay ni Jesus? Ano nga mga butang ang ginapangamuyo mo?