LESON 82
Jezi montre disip li yo ki jan pou yo priye
Tout sa Farizyen yo te fè, yo te fè l pou moun ka fè lwanj pou yo. Si yo te fè yon bon bagay, yo te fè l pou fè moun wè. Yo te konn priye an piblik pou tout moun ka wè yo. Farizyen yo te aprann yon seri priyè byen long e yo te konn resite yo nan sinagòg yo ak nan kafou gran wout yo kote lòt moun te kapab tande yo. Se sa k fè moun yo te sezi lè Jezi te di yo: ‘Pa priye tankou Farizyen yo. Yo te panse Bondye t ap sezi tande tout pawòl y ap di yo, men, sa pa t fè Bondye sezi. Lapriyè se yon bagay ki konsène ou menm ak Jewova. Pa repete menm pawòl yo toutan. Jewova vle w di l jan w santi w toutbon.
‘Men ki jan nou dwe priye: “Papa nou ki nan syèl la, se pou non w vin sen. Se pou Wayòm ou an vini. Se pou volonte w fèt
sou tè a kou nan syèl la.”’ Epitou, Jezi te di yo pou yo priye pou manje y ap bezwen pou jounen an, pou yo mande padon pou peche yo e pou kèk lòt bagay y ap bezwen.Jezi te di: ‘Pa janm sispann priye. Kontinye mande Jewova, Papa w, pou l ba w bon bagay. Tout papa ak manman vle bay pitit yo bon bagay. Si pitit ou mande w yon pen, èske w t ap ba li yon wòch? Si l mande w yon pwason, èske w ap ba li yon koulèv?’
Apre sa, Jezi esplike yo leson an: ‘Si w konnen fò w bay pitit ou bon kado, alewè pou Jewova, Papa nou, l ap ban nou lespri sen tou. Sèl sa w bezwen fè se mande l li.’ Èske w suiv konsèy Jezi te bay la? Ki bagay konsa ou mande Bondye lè w ap priye l?
“Kontinye mande, e y ap ban nou. Kontinye chèche, e n ap jwenn. Kontinye frape, e y ap ouvri pou nou.” — Matye 7:7.